Home Den Mi Cabes ‘Y si gobierno no trece solucion, hende mes lo busca esaki’

‘Y si gobierno no trece solucion, hende mes lo busca esaki’

740

Aruba! Con mi ta haya bo falta. Mas cerca e dianan di bay yega, ta manera mas dolor e ta haci pa wanta ta asina leu di cas. Pero bon, ban papia!
Den palabranan di e CEO di Unilever,  hendenan ta buscando solucion y si gobierno no trece esaki nan mes lo pone man na obra y inverti den negoshinan cu si ta trece esaki.

Ultimamente na scol mi ta studiando hopi tocante responsabilidad social. No necesariamente desde e punto di bista di activismo riba su mes y su beneficionan, si no mas bien riba con esaki ta influencia negoshinan. Rond di mundo, hende a cuminsa lanta ariba den nomber di medio ambiente y demas causanan social. Nan tin companianan bou presion pa actua di un manera mas etico y honesto. Esaki no ta keda na palabra so, studionan a comproba cu hende ta te hasta dispuesto pa paga mas si tin garantia cu e producto a wordo traha den un forma cu ta liber di crueldad. Inversionistanan ta mas dispuesto pa inverti den companianan cu ta mas etico tambe. All in all, e futuro di Corporate Social Responsibility manera nan ta yam’e, ta mustra briyante.

Tambe nos ta studia con companianan ta haya nan mes den un crisis y con comunicacion den un forma strategico por salba of kibra nan reputacion. Un ehempel di esaki: dos dia pasa Aruba mes a mira un crisis di un compania tuma luga. Un fuente di noticia cual nos no ta bay menciona, a haya ta masha leuk idea pa pone un fake news di masha mal gusto como joke di un april. Wel, nan joke a backfire y na luga di hari locual nan a haya tabata backlash di tur hende incluyendo gobernantenan. Djei tur hende a cuminsa grita cu nan lo un follow y e boycott e fuente di noticia aki. Eventualmente nan a delete tur cos y haci manera cu nada no a pasa. Esaki no ta un problema chikito pa e compania, esaki ta un crisis mirando cu e acto ta rekeri actua rapido y di un manera eficaz. Y aunke nan por pidi sorry e berdad ta cu e daño na nan reputacion a wordo haci caba y esaki ta dificil pa mehora. Podise nan lo core cu suerte ya cu nos ta un pueblo cu ta lubida lihe. He he.

Pero bon, manera semper tin luz den scuridad, e ta bunita pa remarca cu mientras nos mesun gobierno y nos mesun companianan ta haci y deshaci left and right. E ciudadano comun y coriente ta busca solucion of ta enfoca riba con nan mes por yuda pueblo. E lucha di Aruban Warriors a haya di e proyecto Isla di oro ta remarcabel. Mientras cu otro a pasa april fools ta haci delaster un mal joke, e fundadonan di Hands4Addicts a subi caya pa duna adictonan ambulante un baño, paña, cuminda, etc. Aminsa unda nos ta bay no, pero mientras nos tin ciudadanonan cu ta sali y mustra cu na luga di papia nan si ta haci, tin speransa. Pa’lante es para alla!