Tin hopi pregunta cu a lanta a base di e carta habri cu drs. Greg Peterson a manda pa Prome Minister Evelyn Wever Croes y su Excelencia Gobernado Alfonso Boekhoudt. E preocupacion di drs. Peterson ta articulo 10 di e Kiesverordening, Ley di Eleccion cu ta permiti partidonan haya e lista di personanan registra cu derecho di voto.

Di e informacion cu Parlamento a ricibi directamente di Director di Censo, ya lo no saca e lista di votado manera tabata haci antes. E lista awor lo inclui awor unicamente e nomber di e persona, su fam, sexo, dia di nacemento y luga di nacemento. Lo no tin e adres mas riba e lista

E decision aki ta pa evita cu ta molestia hende na nan cas dia di eleccion.

Motibo cu mester pone tur otro dato, manera nomber, y fama y sexo ta pa asina partidonan por controla contra fraude.

Di otro banda, Bon Dia Aruba a compronde cu en todo caso di parti di Accion21, nan ta sostene e implementacion di e GDPR, cu ta e General Data Protection Regulation di Union Europeo, esta e regulacion di proteccion general di data. Esaki tambe ta p pon’i den e landspakket. E parti aki ta pa proteha datonan di cada persona, pues ta proteha e privacidad. Den concepto di Daphne Lejuez, cu ta Parlamentario independiente, e ta nifica cu mester revisa e Ley di Eleccion riba e punto aki.

Segun e landspakket pa prome di Februari mester tabatin un plan cla pa hunto traha na un nivel harmonisa di proteccion di data personal denter di Reino. Esaki mester sosode a base di un rijkswet. Unabez e plan con ta bay traha riba e harmonisacion aki ta cla, lo stipula e trayecto di su implementacion.

Y Presidente di Conseho Electoral Glenn Thode ta kere den garantisa privacidad. “E reglanan di privacidad a cambia mundialmente na 2018, y tin bon motibo pa esey, segun e Presidente di Conseho Electoral Dr. Glenn Thode na Bon Dia Aruba. Pa tal motibo mes, mester a haci e proceso mas sofistica, unda a introduci e asina yama QR Code.

Dr. Thode no por a splica mas pa motibo cu e tabata den un reunion cu tabata rekeri su atencion. Bon Dia Aruba lo sigui den contacto cu Dr. Thode riba e preocupacion di ciudadano Greg Peterson.