Diahuebs mainta, Prome Minister mr. Mike Eman hunto cu tur departamento y instancia envolvi den e accion di limpiesa rond nos isla, como tambe miembro y bos importante pa San Nicolas den Parlamento, esta Otami Thomasia, a informa comunidad di e siguiente localidad cu lo bay tene e accion di Baki den Bario.
San Nicolas, e veld dilanti Pit Stop of dilanti Botica Benu Centro Medico San Nicolas lo bira e area asigna pa Baki den Bario. Esaki ta e esfuerso grandi cu ta tumando luga pa cu limpiesa den tur bario. Un grupo grandi y bon coordina lo yuda un biaha mas prepara e localidad pa asina e accion cana lihe y tur hende haya oportunidad di deshaci di nan desperdicio.
E orario ta keda igual, cuminsando for di 7:00 AM – 11:30 AM caminda e personal y boluntarionan lo ta presente pa dirigi e accion. Kier recorda e comunidad tambe cu Fundacion pa Nos Comunidad (FPNC) lo ta presente, si acaso tin mueble of artefacto cu ta den bon condicion y ta desea di entrega esaki como donacion, lo ta posibel. Nan lo tin nan propio team na e localidad cu lo ta encarga pa coordina esaki. Tambe lo tin colecta di placa pa e fundacion.
