Yellow ta sirbi su sentencia na St. Maarten

Manera a indica varios siman pasa Yellow lo sirbi su sentencia di 18 aña den prizon na St. Maarten.

Ministerio Publico ta bisa cu e motibo ta pa su mesun siguridad y siguridad di otronan. E caso a sirbi tres siman pasa den corte den prome instancia y siman pasa diabierna a dicta sentencia. Yellow mes no kier a bin Aruba pa scucha su sentencia segun Ministerio Publico, el a prefera pa keda St.Maarten y eynan nan a inform’e.

Informacion cu nos matutino a publica den luna di maart 2016 a indica cu menasa a sali for di prizon aki na Aruba den direccion di Yellow. Consecuentemente pa evita cualkier situacion na KIA a opta pa no cera e delincuente aki na Aruba.

Caso hopi intenso

Entre december 2015 cu februari 2016 tabata tin un buskeda grandi di Yellow pa motibo cu a mata un bouncer na Olde Molen y gravemente herida un otro persona. Esaki seguramente tabata un caso hopi intenso unda cu tambe a hasta redobla un recompensa pa e tip di oro pa gara e sospechoso aki cu un suma di 10 mil florin. Polis a detene Yellow riba dialuna 15 di februari na un cas situa na Weg Sero Blanco na San Nicolas den cercania di Palo Marga. E tip cu a conduci na su detencion no a bin for di un fuente cu tabata rekeri pa paga e recompensa.