Yhoely y Edwin Willems: “Nan a destrui nos por completo. Nan a destrui nos famia”

Pa Yhoely Willems y su famia diadomingo 4 di januari tabata un anochi normal, un anochi caminda nan a sali pa distrae y pasa un rato agradable sin pensa cu den fraccionnan di seconde nan bida lo cambia por completo. Den un entrevista cu Bon Dia Aruba Yhoely, hunto cu su ruman homber Edwin Willems, ta papia tocante e anochi, y e dianan despues, unda nan mama y su casa a perde nan bida despues cu un chauffeur a alcansa nan cu auto y a bandona e sitio.

Yhoely a conta cu su persona, hunto cu su casa Hector Fernandez, y su mama Yosely Paulina Vasquez Gonzalez, y casa di su mama, su stiefvader Carlos David Vialez Valerio tabata saliendo for di Seaport Casino, canando trankilamente pa bay nan auto. El a splica cu nan tur cuater tabata cla pa crusa caya for di e banda di Lucy’s Bar & Restaurant direccion Rennaisance Mall, y su persona hunto cu casa a crusa prome y su tras tabata su mama y su stiefvader.

El a enfatisa cu na momento cu nan a wak caya pa cuminsa crusa nan no a wak auto ta bin, no tabatin señal di peliger y diripiente un auto a aparece y asina lastimamente a dal su mama y su stiefvader.

“Ami ta djis corda cu mi a wak dos luz blanco hopi bright cu a blind mi, mi no a wak auto, mi a djis wak dos luz practicamente riba mi y locual mi por bisa ta cu mi ta corda cu mi a sinti mi casa a rek mi y despues di esey ora mi a bira wak, mi mama y mi stiefvader tabata benta riba caminda caba,” Yhoely a splica. Un imagen cu lo persiguie pa resto di su bida.

E impacto tabata violento. Un auto cu tabata coriendo riba caminda na un velocidad hopi halto, cu segun Yhoely por a compronde tabata alrededor di 180 km pa ora.

Despues di e impacto e auto no a para, no a wak atras, no a yama pa ayudo, no a asumi responsabilidad. El a sigui core y a huy.

Yhoely a conta cu despues di e accidente, el a yama ambulance y su ruman homber, Edwin, y nan a ricibi asistencia tambe di un polis cu tabata casualmente coriendo riba e mesun caminda, den e otro direccion, despues di a caba di baha di su warda y a wak e accidente tuma luga.

E incidente aki ta uno cu a laga Yhoely marca pa resto di su bida. El a conta cu aunke el a lanta un poco miho, tristesa so ta reina den nan cas. “Mi no por splica e efecto cu e tin riba mi. Mi no por bay traha ainda, mi no por drumi den scuridad pasobra mi ta haya ataca di panico. Si mi keda keto un rato y mi mente bay leu mi ta haya flashbacks di e accidente. E cos ki ta algo cu ta afectando mi y mi no sa con mi ta bay sigui. Mi ta asina afecta. Mi no kier anochi yega pasobra mi no por drumi, mi no por come. Mi no por haci nada,” el a expresa cu un tristesa profundo.

Di su banda, su ruman homber, Edwin Willems, tambe ta experenciando un tristesa enorme cu no tin splicacion.

“Drumimento no ta bay. Comemento no ta bay. Mi yiunan no por drumi pa bay scol. Nan a destrui nos por completo. Nan a destrui nos famia. Hopi comentario ta bisa nan a destrui dos famia, pero no ta asina. Nan a destrui un famia pasobra e otro famia ta haya su libertad back y ta sigui, pero mi famia ta destrui pa semper,” el a bisa.

Edwin a trece dilanti un punto cu tin no solamente e, pero hopi ciudadano disgusta. Ta trata di e hecho cu no a confirma identidad di e sospechoso. Aunke riba rednan social y den medionan di comunicacion e identidad di e sospechoso a bira conoci, autoridadnan no a confirma esaki oficialmente ainda.

Tocante esaki, Edwin a indica cu for di su punto di bista y di loke e por a compronde ta cu e famia di e sospechoso tin hopi conexion y tin influencia. El a enfatisa cu ta pa e motibo ey el a pone hopi presion pa publica potret y identidad di e sospechoso.

El a splica cu di prome dia caba nan a mand’e potret di e chauffeur y su informacion. “Si mi no lo a pone presion, y mi ta kere pueblo di Aruba tambe cu ta hopi rabia no lo a keda pone presion, nan no lo a ni pone potret di e chauffeur,” el a señala.

El a agrega cu ademas tin medio di comunicacion cu a pone noticia incorecto bisando cu e famia di e chauffeur a contacta nan y cu ta bay para responsable pa tur cos, pero esey, el a indica, no ta berdad.

“Nada no ta bay trece mi mama back, nada. Prome dia mi tabata hopi rabia, mi tabatin un mente hopi scur. Pero si mi bay tuma vengansa e no ta bay trece mi mama back y mi ta bay haci e situacion pio pa mi famia y mi yiunan. Practicamente aworaki nos rumannan tin cu apoya otro pa keda e pilar di e famia ki,” el a expresa.

Edwin a splica cu su meta principal ta pa logra husticia y e kier organisa un manifestacion pa yuda yega na esaki.

“No ta husto cu hende inocente ta keda perde nan bida. Y e no ta un problema cu nos tin di awor cu el a pasa cu mi mama so. Mi tin varios tempo ta wak hopi hit and run. Locual mi ta desea pa mi pecho por ta un tiki alivia, ta un manifestacion cu por causa impacto pa nos por drecha nos leynan na Aruba. Conscientisa ta bon y nos tin cu cuminsa na nos mes pasobra nos tin un problema di alcohol na Aruba. Hopi hende por controla nan mes y hopi hende no. Hopi hende ora nan dal dos drinks nan por core bay cas riba 40 y hopi hende por dal dos y bira loco. Y esaki ta sin conta tambe cu talbes tin ta mix bebida cu droga,” el a menciona.

Edwin a expresa cu e ta un tiki desilusiona tambe cu e manera con e proceso a cana door cu nan no a haci e chauffeur tuma ni sikiera un test di droga, cual el a indica tambe mester bira un rekisito den casonan asina pa yuda sostene pruebanan den corte.

El a indica cu den e proceso y caso aki tin hopi cosnan chikito cu por stroba nan cu dia nan bay corte e sentencia ta bira zwak pasobra corte ta pidi hopi prueba pa por duna castigo. El a agrega cu mirando cu ley di trafico den caso di morto ta permiti un castigo maximo di 4 aña, e kier bringa pa husticia no solamente pa su mama, pero pa tur hende cu a yega di pasa den e cos ki.

El a conta cu despues di e accidente di su mama un cantidad di persona a yam’e bis’e cu nan tambe a yega di ta victima di hit and run y e personanan cu hacie no a haya niun castigo. El a conta specificamente e caso di un meneer cu a yam’e y bis’e cu despues di un accidente di hit and run el a keda ciego y no por haci nada mas, y e persona cu a dal e mes ta liber.

“Mi tin mil y un testimonio cu mi tin pensa di saca un documentario despues di dera mi mama pa nos por bay manifesta pasobra e cos ki no por sigui asina mas. Si e cos ki sigui asina ki ta bay bin venganza, ta bay bin hendenan den un momento di rabia cu ta pensa riba e inhusticia cu a ser haci. E victima y famia di victima ta sufri mientras e otro persona mes ta keda bon,” el a bisa.

Pa loke ta proceso of informacion di e caso, el a indica cu autoridadnan no a tuma contacto cu nan, no a bisa nan ken e chauffeur ta ni nada. Ta su persona mes mester pone presion pa por haya un tiki informacion.

El a menciona cu segun el a compronde e auto no tabata ni sigura tampoco. “E cosnan ki no por sigui pasa na Aruba. Hende sin rijbewijs, hende sin seguro, hende burachi. Nan ta dal auto hit and run, bay cas spula boca, bebe un tiki awa, entrega nan mes e siguiente dia ora dosis di alcohol baha. Nos tin cu cambia algo eynan tambe, nos tin cu ta mas prepara. Por ehempel e accidente a pasa 11or y despues di tres ora bo a gara e sospechoso, y e nivel di alcohol a midi tanto, mester calcula cuanto porcentahe di alcohol a baha durante e oranan cu a dura pa captura e persona,”el a bisa.

Por ultimo, Edwin a expresa cu su deseo ta pa e y su famia haya apoyo y pa tur hende cuminsa habri wowo y join su manifestacion pa asina pueblo hunto pone presion pa cambia ley. “Nos mester sigui cu e lucha pasobra si nos no sigui, e cosnan aki ta bay keda pasa. Locual mi ta pidi ta pa tur hende apoya mi den e manifestacion pa nos por trece husticia,” el a finalisa.