1 januari 2023 ta acercando rapidamente sin claridad ariba e ley fiscal nobo

Gobierno di Aruba (GoA) a informa comunidad di Aruba na augustus cu no lo continua, pa awo, cu e reforma fiscal pa un sistema di BTW, pero a opta pa keda cu e sistema actual y hisa BBO. Adicionalmente, GoA a informa cu nan a opta pa introduci algun di e medidanan cu mester a bin cu e reforma fiscal pa un BTW, awo hunto cu e subida di e BBO. ATIA a vocifera den pasado caba riba algun di e medidanan.

ATIA kier informa cu e ta sumamente preocupa paso aki 32 dia e ley fiscal nobo mester drenta na vigor, pero ainda no tin claridad kico exactamente ta bay tin den e ley. Te ainda ta loke nos por a lesa of mira riba rednan social solamente, pero nada specifico. Loke nos kier evita ta loke a pasa ora a introduci BBO na inicio, cu esaki a pasa di un dia pa otro sin cu comercio por a prepara dignamente.

Como gremio comercial nos tin un deber na nos miembronan y comercio di Aruba completo pa tene nan bon altura kico e cambionan den ley lo ta y ki efecto esaki tin riba un compania y tambe economia di Aruba. Pero tambe pa yuda nan te unda cu nos por pa prepara pa e cambio nan cu ta na caminda. E proceso pa cambia tur prijs ta uno cu ta tuma su tempo paso e BBO ta inclui den e prijs di e productonan.

Finalmente, mester indica cu ATIA lo a prefera un reforma total pa un sistema di BTW, paso un sistema fiscal cu un base amplio, simpel y cu ta regula su mes, lo ta mas beneficioso pa isla di Aruba. Pero como december y dia nan di fiesta ta den porta, ATIA ta hasi un suplica na GoA pa duna comercio suficiente tempo y oportunidad pa prepara pa haci e cambionan administrativo necesario cu ta bin cu e ley di BBO y otro medidanan nobo.

ATIA

Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade, www.instagram.com/atiaruba, y https://www.linkedin.com/company/aruba-trade-and-industry-association.