For di merdia di ayera, habitantenan den area di Parkietenbos un biaha mas a constata huma preto ta sali for di e dump. E huma a keda visible te den oranan di atardi.
Dia 13 di november ultimo, despues cu dump a pega na candela, minister Ursell Arends a comenta:
“Dump Parkietenbos ta un crisis nacional y e candelanan aki ta urgi nos pa acelera mas ainda e proceso pa cera dump Parkietenbos y ciudadanonan di Aruba por ta sigur cu nos lo haci nos maximo esfuerso pa cu esaki.”
Ademas el a agrega cu “den 1 aña nos a bin ta traha riba un solucion structural pa un problema cu a bin ta causa peliger na nos medio ambiente y pa e salud di nos habitantenan ya pa 70 aña caba, pero pa 31 di december 2022 nos ta bay logr’e!”
Sinembargo, ainda no ta conoci si ta bay logra cera e dump dia 31 di december proximo segun plan, y unda ciudadanonan mester acudi pa hiba nan desperdicio.
