10 prioridad pa accion sostenibelidad Caribense

E prome foro di Caribbean Sustainable Development Forum unda mas cu 25 paisnan y teritorio for di Caribe a participa a tuma luga na Aruba. Remarcabel ta cu esaki no a ricibi mucho atencion. E foro ta bin for di Nacionnan Uni y ta financia cu placa di ministerio di Asuntonan Interior di Hulanda.

E importancia di e foro aki ta cu e ta bin for di e acuerdo di Paris riba e pasonan cu e paisnan miembro di UN mester tuma pa combati e efectonan di e cambio di clima. Aruba tambe a mara su mes na e acuerdo aki por medio di Reino. Durante e evento ey a yega na un conclusion cu mester tin algo special pa Caribe y siguramente e islanan/teritorionan desaroyo, yama Small Island Developing States (SIDS). Hulanda a financia e foro aki pa motibo cu durante nan campaña pa bira miembro di e UN Safety Counsil, nan a priminti di sostene e SIDS di Caribe pa yega e metanan sostenibel cu UN a pone.

E SIDS no ta contribui relativamente hopi na e cambiamento di clima. Sinembargo nan lo sinti e efectonan mas lihe y pa algun e impacto lo ta hopi mas grave.

Coral den peliger
Pa motibo di e foro, minister di Asuntonan di Interior y Reino, Ronald Plasterk (sinta riba potret), a bishita Aruba na comienso di e siman aki. Riba e prome dia di e foro, e mandatario a haci e pregunta kende den Reino ta responsabel pa e calidad di coral. Pasobra pa e parti di islanan di BES Hulanda ta responsabel, e ta indica, y pa Corsou ta Corsou, pa Aruba ta Aruba etc. Sinembargo e ta remarca cu no tin niun instancia of pais cu ta tuma e responsabilidad completo. Pues si un pais ta haci algo pero e otronan no, esaki lo keda tin consecuencia pa e coral den henter Reino. Pa motibo di esey minister Plasterk ta urgi pa bin cu un grupo di trabou unda tur paisnan ta representa a bin cu un maneho colectivo pa maneha e calidad di coral.

E tema di coral ta hopi importante pa e islanan Caribense den Reino pa motibo cu nan ta un ‘nursery’ pa pisca y otro organismo cu ta sumamente importante pa conserva e bioversidad maritimo. Si no tin coral, e ta un sla duro no obstante pa nos medio ambiente pero tambe nos economia, entre otro turismo y piscamento. E calidad di nos coral ta asina deplorabel a resulta riba e foro, cu tin pruebanan awor cu den e proximo decada ta resta casi nada. Cual tin, manera menciona, un impacto desaster pa Aruba y su turismo, y tur e islanan Caribense den Reino.

Punta Cana
Un di e miho ehempelnan for di Caribe mes cual a wordo presenta na e foto, ta e proyecto na Punta Cana, Santa Domingo. Akinan desaroyo turistico a bay man den man cu proteccion di naturalesa y medio ambiente. Representante di e grupo aki, Francisco Rainieri (riba potret), a duna ehempelnan con nan a ehecuta durante 20 aña. Pasobra no tabatin un maneho central sea reglanan for di gobierno pues nan mes a bin esaki. Por ehempel edificionan turistico den e area ki no mag di ta mas halto cu 17 meter, cual ta e haltura di e palonan di coco. Esaki e ora a bira despues un regla di gobierno. Pa e construccion di e edificionan nan ta uza material natural, cu nan mester a kap pa crea espacio.

Tambe nan a bin cu un sistema di recicla awa sushi 100% anto uz’e pa e golf course. Ademas nan ta recicla e desperdicio di e condominio nan y yuda restaura e coralnan, hasta replanta nan den areanan unda nan ta den mal condicion. E ehempel di Punta Cana ta mustra ey ora con un grupo priva por pusha sostenebilidad ora ta falta un maneho cla y inversion for di gobierno. Tur otro desaroyado den e area aki awor mester tene cuenta cu locual e grupo aki den pasado a determina.

No por warda mas
Un experto den economia di cambiamento di clima, Frank Ackerman, a bin cu e ponencia interesante: cambio di clima ta tumando luga y ‘wait and see is not an option’. Ta p’esey mester tuma accion awor, e ta bisa. E foro a dura 3 dia unda hopi experto a discuti den gruponan di trabou e accionnan cu mester wordo tuma pa realisa e metanan di sostenibelidad. E ultimo dia a keda presenta e prioridadnan pa tuma accion entre 2017 y 2018 den un documento yama ‘Aruba Commitment’. Nan ta 10 prioridad total. Manera envolvimento di empresanan, energia genera for di fuentenan natural siguro y pagabel pa hende pober, calidad di awa potabel, preservacion di coral y bida maritimo, conservacion di naturalesa, agricultura organico. Den e siguiente edicion di Bon Dia Aruba lo elabora mas riba e prioridadnan aki.
E foro lo tuma luga cada 2 aña.

You May Also Like

Orden den publico a keda subraya na reunion pa trata presupuesto 2018

Durante prome reunion pa trata presupuesto di aña 2018 tabatin enfoke riba e orden ...

Segun historiado Chando Pietersz ‘Pensamento di papia hopi negativo riba migrante mester cambia’

ORANJESTAD – Diabierna ultimo Fundacion Rancho a cuminsa su ciclo di actividad di cinco ...

Serlimar ta keda encarga cu sushi y maneho desperdicio

E proceso ta continua pa loke ta yega na un solucion duradero pa maneho ...

16Mrt, JO, Apartamento1.jpg

Ronella Tijn Asjoe-Croes, ATA: ”Negoshi di huur apartamento ta afectando sector hotelero”

Den cuadro di e fenomeno internacional di otro acomodacion cu awor tambe ta afecta ...

60 cliente cu limitacion mental temporalmente sin guia

  Pasadia Briyo di Solo ta haci apelacion pa yudansa Siman pasa tabata tin ...