Fin di siman Bon Dia Aruba a publica riba e prome foro organisa pa Nacionnan Uni y financia pa Hulanda riba sostenebilidad den Caribe. Na final di e evento aki e mas cu 25 pais y teritorio a yega na un plan di accion cu 10 punto cu mester di atencion urgente.
E participantenan a discuti den gruponan di trabou riba e topiconan y yega na diferente conclusionnan. E prome punto menciona ta pa stimula e colaboracion entre e sector publico y esun priva pa yega na un desaroyo sostenibel, manera crea incentivonan manera subsidio pa stimula e economia ‘smart’ y tambe di crea mas cupo di trabou den ramo di sostenibilidad.
Coral den estado deplorabel
E di dos punto ta pa percura cu e cantidad di pisca lo bay na e nivel bek unda ta sostenibel pa futuro y tambe cura e eco-sistemanan di marina manera e mangelnan y coral. Manera Bon Dia Aruba den mas cu un decada e situacion ta asina deplorabel cu no tin un caminda mas pa bay bek. E efectonan di e mal funcionamento y cambio di e eco-sistemanan ya ta birando mas y mas visibel na Aruba tambe. Por ehempel por mira mas alganan den lama cual ta formando un riesgo grandi cu bou di nan lo crece alga toxico. Nan ta asina peligroso cu por mata hende. Den diferente parti den mundo por mira e efecto aki riba, yama ‘red tides’. Esaki e ora lo trece un impacto grandi pa nos turismo cual ta nos unico pilar economico awor.
E di tres punto di accion den Caribe ta e conservacion di mondi den colaboracion cu e habitantenan. Mesun momento mester exploita recursonan natural den un forma sostenibel. E di cuater punto di accion ta mester yega na un cooperacion regional riba tereno di innovacion tecnologico pa maneha awa y desperdicio, acceso na awa pa bebe cu ta pagabel y costanan y lama limpi.
E di cinco punto ta promocion di agricultura sostenibel, unda e paisnan Caribense ta siña for di e tecnologia uza na Cuba y Santo Domingo, St. Lucia y promocion di cuminda saludabel. E di seis punto ta pa yega na energia sostenibel y pagabel pa asina e hendenan pober den Caribe tambe por probecha di e energia. E di shete punto di accion ta trata un ‘Caribbean masterplan’ riba turismo ecologico y sostenibel, combina cu un sistema di emergencia regional, unda e organisacionnan turistico lo ta envolvi.
Conscientisacion
E di ocho punto di accion ta urgi pa yega na programanan di educacion y training, campañanan pa educa, stimula y promove conducta sostenibel bou di e populacionnan Caribense. E penultimo punto di accion ta bay over e necesidad di conecta y transforma e institucionnan regional di investigacion y training cu tin den centronan di excelencia riba terenonan di conservacion, energianan renobabel y tambe di implementacionnan exitoso di strategianan pa yega na desaroyonan sostenibel.
Finalmente e di 10 punto riba plan di accion ta pa yega na financiamento di conservacion y desaroyo sostenibel. Y unda gobiernonan, NGO nan, organisacionnan civil y companianan chikito y mediano lo traha riba actividadnan unda e meta ta pa yega realmente na un resultado.
