Segun resumen diario di Departamento di Salubridad Publico, DVG, ayera tabatin 12 persona hospitalisa na Aruba pa ricibi tratamento pa Covid-19.
Di esakinan, 6 ta den Unidad di Cuido Intensivo (ICU) mientras 6 ta riba piso general. E 18 pashent Arubano hospitalisa na Colombia tur ta den Unidad di Cuido Intensivo.
Di mesun manera DVG a informa cu ayera 18 persona a recupera di e malesa causa pa e virus SARS-CoV-2, y a registra un total di 11 caso nobo, di cual tres no ta residente.
E cifranan aki ta presenta un tasa di positividad entre nos residentenan di cinco porciento.
E cantidad di caso activo di Covid-19 ayera tabata 173, y e cantidad di fayecido relaciona cu e malesa ta keda na 170.
Datonan di DVG ta ilustra casonan nobo di Covid cu un averahe semanal di 12 caso pa dia y un averahe di tasa di positividad semanal di dies porciento pa dia.
