Fraccion di MEP ta bolbe exigi un Reunion Publico urgente cu Minister di Salubridad, Mervin Wyatt-Ras (AVP), pa trata e crisis financiero na Dr. Horacio E. Oduber Hospital (HOH). Segun lider di fraccion, Evelyn Wever-Croes, Parlamento tin dos luna ta warda pa e minister bin duna splicacion tocante e situacion, mientras cu preocupacion pa continuidad di cuido medico ta sigui aumenta.
Diamars 18 di november, Fraccion di MEP a manda un carta na Presidente di Parlamento, Sr. A.M. Sneek, recordando cu desde 10 di september 2026 nan a entrega un peticion formal pa convoca un Reunion Publico cu Minister di Salubridad, Asunto Social, Cuido di Adulto Mayor y Maneho di Adiccion, drs. Mervin G. Wyatt-Ras.

Segun e carta, cu ta haci referencia na documento IS/015/26-27, te awe fraccion no a ricibi ningun contesta riba e peticion.
MEP ta considera cu e situacion na hospital ta suficientemente serio pa merece atencion urgente di Parlamento. Pa e motibo aki, e fraccion ta solicita atrobe pa convoca e reunion mas lihe cu ta posibel.
Riba su pagina di Facebook, lider di fraccion, Evelyn Wever-Croes a expresa su frustracion cu e situacion.
“Nos tin dos luna ta warda minister Mervin Wyatt-Ras den Parlamento pa debati tocante e crisis di Hospital. Nada ainda, mientras cada dia nan ta pone bida di hende na peliger”, Wever-Croes a declara.
E lider di oposicion a acusa Gobierno AVP-Futuro di falta di liderazgo y a cuestiona con ta posibel pa resolve e crisis si, segun su post, e minister no kier papia mas cu Raad van Bestuur di Hospital.
Wever-Croes a compara e situacion actual cu e periodo di pandemia, indicando cu durante e crisis di Covid-19, Gobierno anterior a percura pa destina fondo pa proteha bida di hende, a pesar di e dificultadnan financiero di e momento.
“Awor cu Aruba ta landa den placa, e gobierno aki ta hunga cu bida di hende”, e parlamentario a expresa.
Problemanan financiero ta afecta hospital
E preocupacion di MEP ta bin despues di varios luna di discusion tocante e situacion financiero di HOH, cu a resulta den advertencia di directiva, specialista medico y sindicato di trahador.
Manera Bon Dia Aruba a reporta anteriormente, hospital ta enfrenta un deficit financiero cu, segun directiva, ta pone presion riba su capacidad pa sigui ofrece tur servicio medico na e nivel necesario.
E problema principal ta cu e cantidad di pashent y e demanda pa cuido medico a aumenta durante añanan, mientras cu e financiamento cu hospital ta ricibi no a crece suficientemente pa cubri e gastonan adicional.
Hospital a indica cu, sin fondo adicional, por tin necesidad pa limita cierto servicio medico. Un sala di operacion a keda cera y cierto examen medico a sufri retraso.
Riba 11 di november, trahadornan di hospital a participa den un accion di protesta di dos ora, organisa pa sindicato ABV, pa expresa nan preocupacion tocante e situacion.
Presidente di ABV, Gina Maduro, a indica cu e falta di financiamento structural ta crea incertidumbre pa trahadornan y por afecta continuidad di cuido medico.
Director financiero di HOH, Gregory Croeze, tambe a adverti cu e situacion no por sigui asina indefinidamente, pasobra hospital mester dispone di fondo suficiente pa paga su obligacionnan y mantene e calidad di servicio.
Pago adicional no ta solucion structural
Na comienso di november, hospital a ricibi un pago di aproximadamente 15 miyon florin di AZV, cu a permiti e institucion cumpli cu su obligacionnan financiero mas urgente.
Sinembargo, e pago aki no a elimina e problema structural.
Directiva di hospital a expresa preocupacion cu, si AZV compensa e adelantonan financiero anterior durante december, hospital por enfrenta dificultad nobo pa cumpli cu su obligacionnan, incluyendo pago di salario.
E discusion entre HOH, AZV y Gobierno ta concentra riba cuanto fondo hospital realmente mester pa ofrece cuido medico, y con e financiamento mester wordo organisa pa futuro.
Gobierno y AZV a defende e necesidad di un analisis financiero independiente pa determina e necesidadnan real di hospital y yega na un solucion sostenibel.
Minister Wyatt-Ras a indica anteriormente cu cuido medico no mag di wordo perhudica durante e proceso aki.
Di otro banda, directiva di hospital y sindicato ta insistiendo cu e necesidad pa investigacion no mag di resulta den retraso cu por pone continuidad di servicio na peliger.
MEP kier pa e minister duna cara na Parlamento
Pa Fraccion di MEP, e situacion actual ta exigi no solamente negociacion entre Gobierno, AZV y hospital, sino tambe responsabilidad politico dilanti di Parlamento.
E fraccion kier pa minister Wyatt-Ras duna splicacion tocante e estado actual di e negociacionnan, e medidanan cu Gobierno ta considerando y con e lo garantisa cu pashentnan por sigui ricibi cuido medico necesario.
E acusacion di Wever-Croes cu minister no kier sigui papia cu Raad van Bestuur di Hospital no a keda confirma independientemente.
Mientras tanto, e problema financiero ta keda sin un solucion definitivo, y e preocupacion principal ta e posible consecuencia pa pashentnan cu ta depende di servicio di hospital.
Cu su carta di 18 di november, MEP ta pone presion atrobe riba Presidente di Parlamento pa trata e asunto cu urgencia.
E pregunta cu ainda ta pendiente ta ki ora Parlamento lo convoca e reunion solicita, y ki solucion concreto Gobierno, AZV y HOH lo logra acorda pa garantisa continuidad di cuido medico na Aruba.



