Despues cu den fin di siman ultimo por a nota un cantidad grandi di ciudadano cu no a cumpli cu reglanan di distanciamento social, samenscholing, entre otro, ayera DVG a informa cu a registra 176 caso positivo nobo.

Ayera tabata e dia cu mas caso positivo a keda registra den un solo dia, compara cu 141 dia 9 di september, cu tabata e record anterior.

Di e 176 caso nobo cu DVG a registra ayera, solamente un no tabata residente. E cantidad di caso activo awo a aumenta na 1,630.
DVG a informa ademas cu a realisa 599 test, di cual 535 a wordo haci na laboratorio di hospital bao residentenan. E total di cantidad di fayecido no a aumenta ayera, y a keda na 22.

Ademas, 66 persona a recupera.

Mientras tanto, hospital a informa cu tin un total di 40 persona interna. Di esakinan, 11 ta den unidad di cuido intensivo (ICU), mientras cu 29 ta isola den piso general.

For di augustus cu e segundo ola di e brote a cuminsa na Aruba, por a tuma nota cu e cantidad di caso positivo relaciona na e cantidad di test haci pa dia ta varia, entre 25 porciento y 40 porciento. Naturalmente, mientras mas test ta realisa den un dia, mas caso positivo ta keda registra; ya cu menos test lo nifica cu tin casonan positivo cu no ta wordo detecta.

Cu e cifranan mas recien, e cantidad total di caso na Aruba for di cuminsamento di e pandemia ta 3,328. A realisa un total di 26,998 test, di cual 12,015 na aeropuerto, y di esakinan 23,670 a resulta negativo.Ademas, 1,676 persona a recupera.

E apelacion ta bay na comunidad pa cumpli cu protocolnan pa purba di minimisa e impacto di e pandemia aki riba nos isla. Esaki ta inclui medidanan di prevencion como uso di tapaboca, distancia social, laba man y usa hand sanitizer. Alabes purba di evita sali lo mas posibel, y evita sitionan unda tin aglomeracion di hende.

Mirando cu repetidamente, manera Bon Dia Aruba a yega di publica, specialistanan ta indica cu e sintomanan di coronavirus ta hopi similar na grip, pa cual no por facilmente haci un distincion, ta urgi pa cualkier persona experimentando sintoma – sea leve, manera nanishi ta core – yama nan dokter di cas pa haci test. Ademas, keda den isolacion na momento cu presenta cualkier tipo di sintoma, y evita contacto cu mas persona.

 

LEAVE A REPLY

Please enter your comment!
Please enter your name here