Parlamentarionan di Tweede Kamer, Attje Kuiken (PvdaA) y Antje Diertens (D66) ta preocupa tocante e cantidad aumentando di infeccion di coronavirus den parti Caribense di Reino. Tambe nan ta puntra si e instalacionnan medico y e medidanan di gobierno riba e islanan ta suficiente.

Kuiken y Diertens a expresa nan preocupacion por escrito mediante preguntanan pa secretario di Estado, Raymond Knops. Nan ta haci un yamado pa un aumento di e sosten cu Hulanda ta provee, den complementacion di unidad di cuido intensivo, material medico y personal di cuido cu a manda na e islanan na cuminsamento di e pandemia.

Entre otro, nan a haci algun pregunta relaciona cu Aruba. “Bo persona a tuma nota di e noticia ‘Hospital na Aruba no por maneha cuido pa coronavirus’ di dia 11 di september, como tambe e noticia ‘Ola di coronavirus ta inunda Aruba’ di dia 13 di september?” “Bo persona a tuma contacto cu gobierno di Aruba tocante e problemanan relaciona cu infeccion di coronavirus, y cuido pa esaki? Si no, pakico no?” y finalmente, “Ki consecuencia e situacion na Aruba tin riba e cuido di salud na Bonaire, cu te ainda no tin ningun unidad di cuido intensivo (ICU) activo pa coronavirus, ni tampoco ta conta cu su propio capacidad pa test?”

Mirando e cantidad di infeccion di coronavirus ta den aumento ainda riba nos isla, e preguntanan aki ta relevante no solamente na nivel di reino, sino na nivel local tambe.

Pa finalisa,e parlamentarionan ta puntra Knops: “Bo persona por proporciona un descripcion general di e situacion den parti Caribense di Reino relaciona cu e desaroyonan di infeccion di Covid-19?”

No ta conoci ainda ki dia nan por spera un contesta di Knops riba nan preguntanan, ni si lo tuma algun accion pa resolve e preocupacion.

LEAVE A REPLY

Please enter your comment!
Please enter your name here