Diasabra ultimo comunidad Dominicano na Aruba a conmemora e di 177 aniversario di independencia di nan pais Caribeño.

Pa duna contenido na e fecha historico aki a tuma luga un ceremonia senciyo di ofrenda floral solemne riba Plaza Juan Pablo Duarte na honor di e heroe di independencia Dominicano. Den e ceremonia aki a participa representante di Consulado Dominicano na Aruba, fundacion Dominicana Arubanse Juan Pablo Duarte, Cuerpo di Bombero Boluntario di San Nicolas y grupo folklorico cultural Dominicano di Sra. Ramona Garcia.

Presidente di fundacion Dominicana Arubanse, Juan Pablo Duarte, Winston Tavarez a declara na Bon Dia Aruba cu e ceremonia aki a bay den ‘masha bon ambiente,’ y cumpliendo cu tur regla exigi pa DVG. Sinembargo un dia despues e celebracion di e dia di independencia aki a wordo eclipsa cu e tristo acontecimento di e fayecimento inespera di un persona jong di origen Dominicano na entrada di un supermercado basta concuri. El a expresa den nomber di e fundacion cu e ta presidi palabra di condolencia y convivencia cu e famia- y amigonan di e fayecido Anthony Michael Cabenda (30).

El a bisa cu e fundacion a acerca e famia di e fayecido pa asina mustra nan solidaridad riba cualkier cos cu nan mester. Nan por a compronde for di e famia cu ya caba nan ta bezig cu e tramite di entiero di e hoben Cabenda kende aparentemente tabata sufri di cierto kebrante di salud. E fundacion mes a tuma contacto cu e famia ya cu nan ta traha estrechamente cu slachtofferhulp, y e instancia aki a pone nan na haltura di e informacion lamentabel aki.

Den e caso aki nan a conseha e famia riba e pasonan cu nan mester tuma den caso di entiero, ya cu e fayecido tabatin nacionalidad Hulandes. E famia a bay bati na porta di departamento di Asunto Social pa atende cu e gastonan funerario. “E ta un momento dificil!,” el a declara.

Igualmente el a bisa cu e fundacion ta trahando activamente riba tereno social, y ainda nan tin e campaña di comestibel pa e hendenan cu ta pasando den duro dor di e pandemia aki. “E fundacion Dominicano t’ey pa sigui yuda,” el a bisa. Pero nan mester di donacion di comestibel y nan ta sigui buscando colaboracion di instancia y personanan pa nan por sigui cumpli cu e compromiso social aki.

Segun Tavarez e cantidad di hende cu ta bati na porta di nan fundacion ta subiendo. Mayoria di biaha nan ta haya via WhatsApp tur dia solicitud pa ayudo di alimentacion. E fundacion aki a logra inscribi via Cruz Cora y Fundacion Pa Nos Comunidad algun famia den necesidad tambe.