3 florin pa liter… Pa basta tempo…?

Gasolin na casi 3 florin pa liter, diesel na 2,86 y lo mas grave ta cu no tin perspectiva pa mehoracion. E situacion internacional cu ta produci e crisis di energia global aki ta parce mas serio cu cinco luna pasa, na inicio di e bloqueo di e Estrecho di Hormuz, impediendo salida di crudo y producto refina for di e paisnan Arabe cu costa na Golfo di Persia, en total como 20% di produccion diario mundial.

Pero promer cu nos bay riba e situacion internacional causante di nos problema local tambe, pa por tin un idea relativo di loke nos ta paga pa gasolin,nos a averigua kico ta e diferencia di prijs pa combustible entre Merca, Aruba y Hulanda. E prijs promedio na pomp na Merca pa gasolin ta awor US$ 4,09 pa galon. Na Aruba ta paga Afl. 2,909 pa liter, loke calcula pa US$/galon ta $6,14. Na Hulanda un liter di gasolin regular (Euro 95) ta sali 2,50 euro (US$ 10,92 pa galon), mientras e Euro 98 ta na 2,70 euro (US$ 11,80 pa galon). Nos no ta esunnan mas golpea anto, pero cada pais mester atende su realidad.

Economia mundial lo mester prepara pa un situacion di crisis di largo duracion. Gobierno Mericano ta en busca di un solucion pronto pa e guera, cu nan mes a inicia y cu awor ta stanca. Esaki en vista di eleccion pa Congreso na november proximo, cu e probabilidad grandi cu partido Republicano ta perde uno o hasta ambos camara di Congreso, si e guera sigui. Mientras tanto Iran ta mustra di tin cierto capacidad combativo ainda, loke ta expresa den nan dominio riba estrecho di Hormuz y capacidad di bombardea e region, incluyendo e basenan Mericano den e paisnan ey. E menaza di Iran di destrui e infrastructura petrolero di e otro paisnan ta e factor mas importante den detene e guera den cierto sentido, pero sin un solucion definitivo. Den medionan internacional ta aparece varios alternativa pa carga cu mester sali via e estrecho, manera tuberia cu ta hiba crudo na otro costa, pero a corto plazo esaki no ta yuda pasobra construccion di esakinan por tuma entre cinco pa diez aña pa realiza. Consecuencia directo di esaki ta cu mester tene cuenta cu un aumento di costo di transporte maritimo pa y for di e Golfo, sigur si Iran y Oman yega na un acuerdo di cobra peahe pa transporte maritimo,cu lo aumenta costo di transporte internacional.

Te awor tabatin algun punto cu a yuda suprimi prijs di petroleo. Saudi Arabia, e mayorproductor di e region, ta sacando un parti di su crudo via tuberia cu ta bay costa occidental di e pais. Tambe un paro momentaneo di e hostilidadnan a permiti un cierto cantidad di petroleo sali for di e region ainda via Hormuz. Merca y varios otro pais tambe a trece parti di nan reserva strategico di petroleo riba mercado, loke a logra mantene prijs di petroleo na un nivel menos alarmante. Pero awor e reservanan ey no ta duna pa tanto mas, mientras e situacion di e guera ta parce ta bay ta algo di duracion largo, sin vista riba negociacion cu resultado concreto por lo pronto. Otro factor di aumento di escasez riba mercado mundial di petroleo ta e situacion na Rusia, unda Ucrania ta sacando un parti sustancial di produccion, procesamento y facilidad portuario pa exportacion di petroleo for di circulacion. Rusia tabata produci te recientemente alrededor di 10 miyon bari pa dia, como 10% di produccion mundial, pero actualmente no ta conoci cuanto ta logra exporta ainda. E guera mes entre Merca y Iran ta mustra mas y mas un ‘callejón sin salida’ pa Merca, sin suficiente misil di precision pa un guera aereo y sin opcion di un guera terestre di ocupacion, cu ta requeri cienmiles di tropa y un costo increible, sin garantia di exito. Un paz negocia ta e unico alternativa, pero Iran no tin pura…

E situacion internacional aki pa nos pais tin consecuencia pisa. No ta trata solamente di e gasto personal pa mantene tur vehiculo riba caminda, sino tambe prijs di combustible (Heavy Fuel Oil; HFO) pa genera energia electrico, y awa. Riba cualkier dia regular, mas di 80% di electricidad genera na planta di WEB Aruba NV ta cu uso di HFO y dado momento esaki lo aparece tambe den loke ta paga na awa y coriente. Pero e duracion extendi di e guera lo tin consecuencia tambe pa transporte aereo y maritimo, resultando den prijs mas halto di mercancia cu mester yega na nos pais; tambe un aumento di ticket aereo ta algo cu por anticipa, cu posible efecto riba turismo. Banda di esaki mester tene cuenta cu e desaroyo economico na Merca mes, ya cu gran parti di nos importacion ta bin di o via Merca. Ta anticipa cu inflacion no lo mengua, sigur no si gobierno di Trump continua cu e politica di tarifa di importacion, loke ta haci producto importa mas caro, sin cu te awor ta mira industria ta bolbe establece na e pais, loke tabata e strategia tras di e tarifanan. Tambe valor di dollar Mericano por bin bao mas presion, si interes pa cumpra bono di estado Mericano sigui bay atras. Merca su debe publico ta acercando 40 triyon dollar, mientras varios pais, manera China y Hapon, ta trata di deshaci di bono Mericano. E perdida di valor compara cu euro lo tin consecuencia pa nos importacion – mas limita – for di Europa. Cautela lo ta e palabra clave pa futuro directo…