Den simannan reciente, titular den noticia a crea un imagen preocupante. Temblor poderoso a causa devastacion na Venezuela y Colombia, cu un temblor na Hapon den e mesun periodo cu e desaster na Venezuela. Mientras tanto, e Volcan de Fuego na Guatemala a drenta un fase intenso di erupcion, produciendo lava, as y fluho pyroclastico peligroso. Mira hunto, e eventonan ta crea e impresion cu algo inusual ta pasando bao superficie di Tera.
Nos planeta ta birando geologicamente mas activo? Un temblor mayor por ocasiona otro centenares of miles di kilometer leu? Y despues di e temblor na Venezuela, pais bisiña Colombia por a sa cu e tabata e siguiente?
E pregunta ta mas complica cu e titularnan ta sugeri.
Miles di temblor tur aña
Temblor ta hopi mas comun cu nos por pensa.
Segun US Geological Survey (USGS), su Centro Nacional di Informacion di Temblor ta detecta alrededor di 20 mil temblor rond mundo cada aña – un averahe di como 55 pa dia.
Mayoria ta chikito, demasiado profundo of demasiado remoto pa causa daño serio, y p’esey nan no ta bira noticia internacional. Pero ora varios temblor destructivo ta sucede dentro di un periodo relativmente cortico, nan por crea e impresion cu actividad sismico a aumenta diripiente.
USGS ta bisa cu aumento temporal den actividad di temblor ta parti di fluctuacion normal y no ta indica, riba nan mes, cu temblor cu ta sucede naturalmente ta birando mas frecuente.
Desde alrededor di aña 1900, registro ta mustra cu e averahe a largo plaso ta aproximadamente 16 temblor mayor pa aña” alrededor di 15 temblor di magnitud entre 7,0 y 7,9 y un temblor di magnitud 8,0 of mas.
Pero añanan specifico por ta considerablemente diferente di e averahe. USGS ta enfatisa cu na 2010, por ehempel, a registra 23 temblor mayor, mientras na 1989 a registra apenas seis.
Tin otro motibo pakico temblor ta parce mas visible awendia. E cantidad di instrumento sismico rond mundo a aumenta enormemente, permitiendo cientifico pa detecta temblor cu anteriormente lo a keda sin registra. Na mes momento, comunicacion moderno ta nifica cu informacion tocante un temblor otro banda di mundo ta yega na miyones di persona den apenas algun minuut.
Un periodo yena cu noticia di temblor no ta nifica necesariamente cu Tera mes a drenta un periodo di actividad excepcional.
Venezuela, Colombia y un pregunta obvio
Dia 24 di juni, un temblor doblete extraordinario a dal nort di Venezuela. USGS a registra un temblor magnitud 7,5 sigui algun seconde despues pa un temblor magnitud 7,5 occidente di Caracas.
E temblor mgnitud 7,5 a sucede na un profundidad superficial di aproximadamente 10 kilometer. Segun USGS, e ruptura tabata asocia cu e frontera entre e plachinan di Caribe y Sur America, y e sistemanan mayor di fayo cu ta atravesa nort di Venezuela.
E Plachi Caribense ta move den direccion oriental relativo na Sur America na aproximadamente 20 milimeter pa aña.
Despues, riba dia 10 di augustus, menos cu siete luna despues di e temblor na Venezuela, un temblor magnitud 7,4 a dal occidente di Colombia cerca di San Jose del Palmar. E temblor a sucede na un profundidad di aproximadamente 107 kilometer y a causa destruccion extenso na partinan di e pais. Operacionnan di rescate ainda ta andando e siman aki, cu mas di 200 morto reporta y miles di herido of desaparecido.
Naturalmente, e coincidencia a lanta sospecha. E temblor Venezolano a pone presion riba Colombia? Colombia tabata e siguiente stap den un cadena di reaccion geologico?
Segun sismologo, no tin evidencia cu esaki tabata e caso.
E temblor na Colombia tabatin un origen tectonico diferente. Expertonan di sistema di monitoreo sismico Colombiano a splica cu e tabata asocia principalmente cu e subduccion di e Plachi Nazca bao di e Plachi Sur Americano. E temblornan Venezolano, en contraste, a involucra movemento mas superficial ‘strike-slip’ asocia cu e interaccion entre e plachinan Caribense y Sur Americano.
Magnitud similar y proximidad geografico no ta nifica automaticamente cu dos temblor ta conecta.
Temblor por ocasiona otro temblor
Esaki no ta nifica cu temblor ta sucede completamente den isolacion.
Ora un fayo ta kibra, cantidad enorme di energia acumula ta keda libera y e distribucion di stress den e capa alrededor ta cambia. Stress por baha na algun lugar y aumenta den otro. Esaki ta un motibo pakico un temblor grandi normalmente ta sigui pa “aftershock”.
Un temblor poderoso por genera centenares of miles di temblor subsecuente mientras e sistema di fayo rond di dje ta ahusta. Mayoria ta considerablemente mas chikito cu e temblor principal, maske algun di nan por produci temblamento fuerte.
Den cierto circunstancia, cambio den stress tambe por pone otro fayo cercano den accion, particularmente si e fayo aki ya tabata altamente bao presion.
Pa e motibo aki, cientificonan ta monitorea cautelosamente e region rond di un temblor mayor.
Pero esey no ta nifica cu un temblor na un pais inevitablemente ta rekeri otro temblor na otro lugar pa “balansa” e movemento di un plachi tectonico. Plachinan tectonico ta structuranan enorme, continuamente den movemento, y e fayonan cu ta separa nan ta comporta den maneranan altamente compleho.
Redistribucion di stress ta real. Un efecto domino na escala di continente ta otro asunto.
Por pronostica temblor?
Despues di e temblor na juni, Colombia por a anticipa un temblor mayor di su mes, y mester a prepara pa esaki?
No den e sentido di pronostica loke a pasa dia 10 di augustus.
USGS ta declara claramente cu ni e agencia aki ni otro cientificonan a yega di pronostica exitosamente un temblor mayor. Un berdadero pronostico di temblor lo mester specifica tres cos: fecha y ora, ubicacion y magnitud. Ciencia actual no por haci esaki.
Pero cientificonan si por calcula probabilidad. Nan por identifica fayo activo, determina cua region ta enfrenta peliger sismico halto, y calcula e probabilidad di un temblor significante tumando lugar durante periodonan di añas of decadas.
Esaki ta crea un distincion importante entre prediccion y preparacion.
Colombia no por a sa na juni cu un temblor magnitud 7,4 lo dal cerca di San Jose del Palmar na augustus. E temblor Venezolano no ta duna un advertencia asina.
Pero Colombia ya tabata sa cu e ta ubica den un region tectonico altamente activo unda temblor destructivo ta posible. Esey ta nifica cu preparacion di temblor no por cuminsa ora cientificonan ta anuncia cu un temblor mayor ta na caminda – pasobra un anuncio asina por no yega nunca.
Standard di construccion, sistema di respuesta di emergencia, educacion publico, infrastructura resistente pa temblor y capacidad di rescate mester existi prome cu e suelo cuminsa tembla.
Y Hapon?
E patronchi aparente ta bira mas interesante ora temblornan ta sucede casi simultaneamente na diferente parti di mundo. Cerca di e momento di e secuencia Venezolano, Hapon tambe a experencia un temblor poderoso. Pa un persona mirando un mapa di temblor global, eventonan di e sorto aki ta mustra conecta: un parti di planeta ta move, y tiki despues, otro parti ta move miles di kilometer leu. Sinembargo, esaki no ta proba un causa.
Temblor grandi ta manda ola sismico den henter e planeta, y cientificonan a documenta un fenomeno conoci como “dynamic triggering”, den cual e olanan aki por, tin biaha, stimula temblor chikito of otro actividad geologico na distancianan grandi.
Pero esaki no ta nifica cu tur temblor grandi cu ta sucede tiki despues di otro tabata causa p’e. Hapon ta para riba su propio ambiente tectonico extraordinariamente complica, miles di kilometer leu di e frontera Caribe-Sur Americano involucra den e temblornan Venezolano. Cientificonan mester examina fayo, ola sismico, mecanismo, distancia y timing prome cu conclui cu dos evento ta relaciona fisicamente.
Coincidencia ta keda posible – y riba un planeta experenciando decenas di temblor detectable cada dia, coincidencia ta inevitable.
Y ainda tin e volcan
Temblor no ta e unico evento geologico halando atencion.
Na Guatemala, Volcan de Fuego a drenta un fase eruptivo intenso na comienso di augustus. INSIVUMEH di Guatemala a reporta emision continuo y intenso di gas, lava y as, hunto cu corientenan di densidad pyroclastico recurente bahando di varios ravijn rond di e volcan.
Poni banda di e temblornan recien, un erupcion asina por reforsa e impresion cu henter e region ta birando stabiel. Pero actividad volcanico y temblor tectonico no ta den un solo cadena di evento.
America Latino ta naturalmente un di e regionnan mas geologicamente activo riba Tera. Riba gran parti di su margen Pacifico, plachi tectonico oceanico ta ser forsa bao di plachinan continental. E proceso aki ta genera tanto temblor poderoso como cadena di volcan activo desde Mexico y Centro America te na e Andes.
Varios volcan Latino Americano ta keda activo pa periodonan extenso, loke ta nifica cu actividad volcanico simultaneo riba su mes no ta evidencia di un evento regional extraordinario.
Un Tera activo – pero no necesariamente mas activo
Loke a pasa den simannan recien ta sin duda dramatico. Temblor mayor a causa perdida humano catastrofico, aftershock ta continua y actividad volcanico a forsa comunidadnan pa confronta otro tipo di menasa geologico.
Pero un cadena di noticia alarlamente no ta evidencia cu Tera a bira mas activo diripiente.
Temblor naturalemente ta cluster. Aftershock ta sigui despues di temblor grandi, temblor independiente por pasa cerca di otro y tiki despues di otro. Volcannan activo por haci erupcion mientras temblor tectonico no relaciona ta pasa otro caminda.
Ciencia por splica pakico regionnan particular ta vulnerable, y monitoreo cada bes mas sofistica por detecta actividad geologico casi inmediatamente. Loke ciencia no por haci ainda ta bisa nos exactamente ki momento e proximo temblor mayor ta bay sucede. E temblor di Venezuela no ta predeci esun di Colombia. Esun di Colombia no ta nifica necesariamente cu otro pais ta “next.”
Pero tur temblor destructivo tin un advertencia diferente – no cu otro desaster ta inminente, sino cu den regionnan geologicamente activo, otro ta bay sucede eventualmente.
