Un grupo di alrededor di 300 maestro y funcionario publico, convoca pa Simar, Seppa y Spa, a marcha diarazon atardi pa Parlamento y Bestuurskantoor pa expresa nan malcontento cu e maneho di gobierno, y en particular di e mandatario encarga cu enseñansa, durante e actual crisis di coronavirus.

Na promer instante e grupo a aglomera dilanti di edificio di Parlamento, unda presidente di Parlamento, mr. Ady Thijsen, hunto cu varios parlamentario di banda gubernamental como di oposicion, a haya un manifiesto presenta di banda di presidente di Simar, Josephine Albertus.

Despues e grupo a move pa entrada na banda pabao di Bestuurskantoor, unda Prome Ministro Evelyn Wever-Croes y algun colega, entre otro ministro Dangui Oduber y ministro Andin Bikker a atende e preocupacionnan di e maestronan. Dilanti Bestuurskantoor Magaly Brito di sindicato SEPPA a hiba palabra.

Promer cu e grupo a sali pa e marcha di edificio bieu di DOW pa Parlamento, a suplica e participantenan pa mantene distancia social. Durante e marcha esey a logra basta bon, sin embargo dilanti Parlamento y despues dilanti Bestuurskantoor no por a ripara nada mas di esaki.

LEAVE A REPLY

Please enter your comment!
Please enter your name here