Minister Presidente, Evelyn Wever-Croes a referi na e problematica di nos residentenan pega den exterior. Un problematica cu a surgi desde cu e paisnan a dicidi cera nan frontera, pa evita e importacion y contagio di coronavirus. Aunke actualmente tin pais cu a cuminsa habri nan frontera, pero mayoria di nan ta leu for di nos.

Den e momento aki nos tin mas cu 300 residente pega den exterior, y na diferente parti di mundo. E mandatario a bisa cu mayoria di e paisnan unda nos residentenan ta pega, ta debi cu e pais ey tin nan fronteranan cera. Un cos cu ta importante pa cada residente pega den exterior, esta registra na e siguiente e-mail adres: regesoaruba@crisis.aw

El a bisa cu e registracion aki ta fundamental pa nan por yuda bo. Pasobra si bo no ta registra, nan no sa cu bo tin necesidad pa bin Aruba. Pa medio di e registracion aki bo ta bisa unda bo ta pega y tambe suministra informacion adicional. Na momento cu nan tin e bista di cuanto hende nan tin pega na un luga, nan ta evalua pa organisa un vuelo. “Ta importante pa bo registra si bo kier pa nos trece bo bek. Te asina mes nos no por garantisa, pero nos ta garantisa bo si cu nos ta haci nos maximo esfuerso,” el a declara

Otro residentenan no por bolbe Aruba pasobra –segun e mandatario– simplemente no tin vuelo. Esaki debi cu e companianan aereo comercial a dicidi di stop di bula. “Nos ta purbando mas tanto cu ta posibel pa regla vuelonan humanitario,” premier Wever-Croes a declara dialuna anochi. El a bisa cu den e caso di vuelo humanitario, tin pais cu ta permiti un excepcion pa e tipo di vuelo aki. E ta un proceso cu no ta facil pa logra e tipo di vuelo aki.

Vuelo humanitario

Actualmente nos tin residentenan pega na Merca. Entre nan studiantenan cu ta studia na Merca y cu pa motibo diferente nan no por keda den e pais aki. El a bisa cu awor cu scol a caba nan por bin, pero ora cu tin vuelo disponibel. Mayoria di e paisnan aki tin un vuelo, na momento cu autoridad Mericano tin mester di busca of trece hende na Aruba.

“Ora cu nan saca un vuelo nos ta yega na palabracion y asina nos ta percura pa nos studiantenan ta ariba e vuelo ey,” el a declara.

 

Pa e situacion di nos residentenan y studiantenan pega na Hulanda ta casi mesun cos. Aunke nan tin mas oportunidad ya cu casi sigur un biaha pa siman tin un vuelo cu ta bini for di Hulanda.

Wever-Croes a splica cu ora KLM ta dicidi di bin cu un vuelo manera nan a haci diadomingo ultimo, tin chens pa cuminsa trece nan bek. Esnan cu ta registra por haya oportunidad pa bin riba e vuelo ey. Den e caso aki cu Hulanda tin un palabracion haci. Ya cu nos mester cu e vuelo aki di KLM por bin Aruba por lo menos un biaha pa siman pa trece remedi. For di 7 di juni tur fin di siman, KLM ta bay manda un avion pa Aruba pa asina nos wordo abastece cu remedinan e luna aki.

Venezuela

E situacion cu a bira mas complica ta e residentenan pega na Venezuela, a pesar cu e pais aki ta bisiña di nos. Actualmente tin un grupo di 39 residente pega na Venezuela. Pero Venezuela tin su frontera cera, el a bisa.

E mandatario a laga sa cu su gobierno a purba den mas cu un ocasion. Te hasta nan a yega di inverti placa, pero te ainda no a logra trece nos residentenan. “Pasobra cada biaha ta parce cu nos ta yegando e punto cu nan ta permiti un vuelo humanitario, Venezuela ta cancel’e. E ta stop na ultimo momento,” el a bisa. Segun premier Wever-Croes, esey ta e realidad cu nos ta bibando cu Venezuela. Pero nan lo sigui purba.

For di Colombia a bin cu un vuelo humanitario dos siman pasa. Gobierno sa cu tin mas residente pega den e pais aki cu mester bin. Nan ta preparando pa busca e manera di trece nan bek. Tambe tin hende pega den otro paisnan manera Ecuador, pero no ta facil, ya cu Aruba no tin un avion pa manda busca nos hendenan. Tampoco tin placa pa manda cantidad di charter pa diferente pais di mundo. Na final e mandatario a bisa cu nan ta purbando y haciendo nan maximo esfuerso pa trece nos residentenan pega den exterior.