Glenda Hernandez, director di Departamento di Asunto Social tabata un di e invitadonan dialuna ultimo durante un conferencia di prensa di gobierno, pa trece informacion tocante ‘kluster vier’ di cual e ta presidente, y bou cual enseñansa ta cay durante pandemia di Covid-19.

Hernandez a cuminsa papia di e proceso cu el a pasa aden desde e momento cu nan a cuminsa cu e apertura di scol. Manera tur hende a conoce dia 15 di maart tur scol a cera y tur cos a pasa masha lihe. Awor el a splica cu nan a pasa den e proceso pa habri scol.

Di esaki, el a menciona cu nan a pone e prome fase, cu tabata na comienso di mei, na unda a papia cu tur bestuur di scol pa puntra nan si por habri dia 18 di mei. Y si nan no por a habri, bisa con nan ta bay zorg pa muchanan cu no por asisti ni via enseñansa digital ni via papel cu maestronan tabata reparti pa cada un di e muchanan.

Tambe Hernandez a destaca cu nan tabata kier sa ki sorto di atencion lo wordo duna pa e muchanan riba tereno emocional y social, algo cu e mes a sigura cu tabata hopi importante pa sa.

Di loke a pasa den fase 1, el a specifica cu nan a cuminsa na comienso di luna di mei y scolnan a cuminsa habri entre 25 y 1 di juni, loke ta nifica un luna despues. Tanten cu e proceso aki ta bayendo, nan a cuminsa cu e di dos fase, cu a cuminsa e di tres siman cu ekipo di maneho a cuminsa sinta pa papia riba riesgonan. DVG tambe a duna un opinion di kico ta e riesgonan si scolnan ta habri y si muchanan ta bao 12 aña.

Despues di un medicion di e riesgo, a dicidi cu pa 8 di juni scolnan lo a mester habri na 100%. Di esaki el a sigura cu tambe a pasa un proceso di casi dos siman. El a señala cu mescos cu a pasa cu apertura di tiendanan, loke ta nifica cu mester tuma tempo, pero di igual manera tin cu habri.

“Ora bo ta den un ley di calamidad, esey kiermen cu e situacion por cambia di un momento pa otro”, Hernandez a comenta, pa es motibo mester tin flexibilidad.

Asina mes, Hernandez a laga sa cu e ta compronde tur e trabou cu a wordo haci di parti di e maestronan, pero mester compronde tambe cu nan ta sigui cu e obhetivo di apertura total. “Nos kier bay den un situacion normal y e riesgonan cu ta existi, nos ta wak nan y mira si ta bon pa habri.”

Manera el a duna di conoce, desde comienso di mei el a sinta cada siman cu e mayoria di school berstuur. Asina tambe a reuni cu e sindicatonan. Di esaki, Hernandez a bisa cu den structura di un calamidad no tin un rol specifico pa sindicato, pa motibo cu ora ta den un ley di calamidad, e decisionnan mester wordo tuma di un minuut pa otro y mester wordo ehecuta tambe, pa loke e sindicatonan a compronde e situacion ey.

Loke nan kier drecha, el a expresa cu tin un espacio grandi entre berstuur di scol y e veld cu ta bezig ehecutando y dunando e lesnan. P’esey e tres luna cu ta bin aki nan ta bay traha hunto cu Bureau Rampenbestrijding Aruba (BRA) pa wak con drecha structuranan di calamidad.

Na e momento cu e calamidad pasa, esey ta nifica cu nan kier duna pa cabesante di scol un rol como di tipo operacional, pa nan por duna conseho na e ekipo di maneho y ora tin un situacion di calamidad, tur maneho nobo ta wordo poni den espera, loke ta nifica cu nada nobo lo no por cuminsa. Tampoco na luna di augustus ora cu scol cuminsa, tanten cu status di calamidad t’ey.