Luna di april ta luna di prevencion y conscientisacion contra abuso sexual y riba e prome diamars di april, ayera 4 di april, a celebra e Sexual Assault Awareness Month (SAAM) Action Day (Dia di Accion di Luna di Concientisacion di Abuso Sexual). E obhetivo di e dia aki ta pa preveni abuso sexual a traves di educacion y e celebracion aki ta enfatisa e importancia pa educa ariba consentimento y compronde e limitenan di cada persona.
E celebracion aki tin como meta pa promove e hermentnan importante pa yuda cambia e puntonan di bista cultural a traves di diferente campañanan riba rednan social, diferente eventonan y mas. Durante full e luna instancianan concerni ta traha pa difundi e informacion relevante y brinda ayudo na esnan cu tin mester.
Na Aruba, Fundacion Contra Violencia Relacional (FCVR) ta un di e fundacionnan cu ta brinda ayudo na victimanan di no solamente abuso sexual, pero abuso en general. Den un entrevista anterior cu Thalina Willems, Asistente Trahado Social na e fundacion, el a informa Bon Dia Aruba pa loke ta trata e cantidad di casonan di abuso, cu aña pasa e fundacion a atende aproximadamente 365 cliente ambulatorio solamente di cual 85% tabata hende muhe y e otro 15% tabata hende homber.
Esaki ta demostra cu hende homber tambe ta pasa den e situacionnan di abuso y aunke e cifra no ta representa tur caso na Aruba, e ta demostra un aumento. Willems a remarca tambe cu no tin un cambio mucho grandi den e cantidad di casonan, den e sentido cu e cantidad no ta bahando y e ta keda alrededor di e mesun cifranan.
E cifranan aki ta trata solamente di e casonan cu ta yega na e fundacion. Tin hopi otro caso den comunidad cu por sali den noticia, pero cu no ta yega na e fundacion cu nan no por conta pasobra e parti esencial pa e proceso di ayudo ta cu e participacion di e cliente den e proceso cu e fundacion mester ta boluntario.
E problema di abuso sexual ta wordo experiencia door di tur sexo, genero, rasa of posicion economico. Conscientisacion y prevencion ta e clave pa evita mas mucha, muhe y homber pasa den abuso den nan bida.
