Diasabra ultimo i-Run Aruba a organisa e famoso Urataka Run 2020. E prome careda oficial cu a cay bou di e national ranking di Patrishi Sports. E aña aki a participa un total di 750 persona cu a core y cana den area di Sta. Cruz, cu un ruta cu hopi subida y bahada di forma cu pa e coredonan mester duna hopi mas pa asina mantene nan tempo.

E careda a cuminsa exactamente pa 5:30 di atardi. Aparte di solo y sero, e biaha aki e coredonan a haya na mes confronta cu hopi biento tambe. Por a mira e cansancio di e coredonan ora nan tabata crusa e finish line. Pero na final sigur hopi contento di a logra completa otro careda. E aña aki e coredo Alexander Hodge a logra drenta na prome luga den categoria di hende homber cu un tempo di 17:48, sigui pa Giannon Eight cu un tempo di 18:08 y Gabriel Prato cu un tempo di 18:22. Den categoria di damas tabatin un sorpresa na momento cu Aniek Aper a duna tur cu e tin pa asina e crusa finish line na prome luga cu un tempo di 20:04, sigui di cerca pa Lana Gobert cu un tempo di 20:21 y Meggie Banwarie cu un tempo di 22:44. Sin duda un careda hopi exitoso y cu hopi ambiente na final pa tur presente.

 

LEAVE A REPLY

Please enter your comment!
Please enter your name here