Siman pasa e noticia di un supuesto ‘alerta’ di tsunami a spanta bastante hende, prome cu a bin un reaccion cu no ta trata di esey. A bin resulta cu tabata un carta interno di e departamento concerni, manda tambe pa e otro entidadnan envolvi cu atencion pa calamidad, pa cuminsa prepara, nada mas. Negativo sigur tabata cu un empleado publico iresponsable a causa tur esaki sacando e carta riba medionan social, y cu e efecto cu talvez e tabata busca. Atrobe nos ta haya nos cu un caso di un funcionario cu aparentemente no tin un nocion den kico e ta trahando y ki alcance cu e cos aki por tin. Di otro banda, esun cu a tuma su tempo pa lesa e carta bon y cu tin algun conocimento den con gobernacion ta opera, y ta comprende bon Hulandes, lo por a conclui hopi rapido cu esaki no ta un ‘alerta’. Y pakico no?

Pa e simple motibo cu un alerta berdadero lo tabatin mester di un teremoto como causante, y si acaso tabatin un peligro real di tsunami, e no ta bay tarda varios dia pa yega na nos costa, manera den e caso aki despues di e serie di teremoto na Puerto Rico. Ban spera cu nunca nos pasa den un tsunami pasobra den e caso ey no ta varios ora, mucho menos dia nos tin pa prepara, sino cu ta cuestion di menos cu esey, den caso di un tsunami na Puerto Rico, cu ta na 900 km di nos. Un tsunami ta haya gran velocidad riba oceano habri y probablemente dentro di mar Caribe lo tin un velocidad menor, no e 500 miya pa ora cu e por alcanza riba oceano grandi, dependiendo tambe di profundidad.

E caso di panico di siman pasa a trece dilanti cu tin hopi falta di informacion den nos pueblo y cu ta urgente pa mehora esey. Nos lo mester cuminsa informa hende di e caracter di un fenomeno asina, unda ta pone bon enfasis riba e cosnan cu ta berdaderamente importante y splica tambe kico no ta asina relevante. Por ehemplo altura. Peligro cu ta bin di lama ta un problema na prome lugar pa e habitante di e area di costa. Nan ta esnan cu ta core peligro directo. Nos a yega di tende cu gobierno, o su departamentonan, a duna informacion di e areanan mas vulnerable di nos isla, y cualnan ta relativamente sigur mirando e altura cu nan tin? Nos a yega di mira informacion kico bo mester haci den caso cu bo ta biba den un area cu por bay haya un tsunami berdadero, con bo ta usa e minuutnan costoso cu bo tin? Busca refugio den un zona mas halto ta e prome y unico pensamento corecto. Bo no por hiba henter bo cas cu bo, asina ta concentra riba seguridad di bo sernan keri na prome lugar. Kico finalmente ta destino di bo propiedad, esey no ta na ningun di nos pa dicidi.

Mester ta cla cu aki nos ta papia di un fenomeno natural totalmente diferente cu un horcan por ehemplo, unda bo tin un cantidad di decision pa tuma: mi ta keda na mi cas, o mi cas ta den un zona cerca lama cu posiblemente ta bay bao awa? Mi cas ta traha pa resisti un horcan? Un pregunta cu probablemente 80% di e doñonan di cas na Aruba lo mester contesta negativamente. Di e banda ey mira, ban spera cu nunca nos haya un horcan pasobra gran mayoria di cas aki no ta traha pa resisti un tormenta di e magnitud ey. Esey ta implica cu den un caso asina nos por bira un victima den categoria di Bahamas despues di horcan Dorian, unda un gran parti di e poblacion a keda sin lugar di biba. Nos ta prepara na Aruba pa esey? Nos tin e impresion cu no. Un di e motibonan ta cu nos ta kere cu nos entidadnan involucra ta enfoca na loke mester sucede prome cu un fenomeno natural asina tuma lugar, pero menos na con pa maneha un desastre di magnitud mayor unavez cu e tuma lugar. Si algo asina mester sucede, ta hopi mas man nos mester pa yuda cu loke nos ta mira actualmente envolvi den e actividadnan preparativo aki.

Esey ta significa anto cu nos mester keda resigna y no haci mas? Nos no ta kere esey. Crea un organisacion mas amplio di respuesta despues di un calamidad asina no ta yuda solamente crea e base pa un ayudo na e poblacion despues di e calamidad, pero automaticamente ta crea mas conocimento y envolvimento den preparacion, cu tin un efecto positivo riba famia, amigo y conocirnan di un persona envolvi. Esaki lo tin un efecto positivo tambe riba envolvimento general di e ciudadano den haci algo positivo pa su mes y pa otro. Den un era cu nos ta carece tanto di lazonan cu ta yuda crea e ‘tejido’ social nobo cu nos mester den e comunidad parcialisa y politisa aki, ata herment cu nos por usa pa haci tur hende mas consciente di preparacion pa calamidad, pero tambe en general mas consciente di loke ta necesario den nos comunidad. Ban cuminsa pensa mas amplio.

 

 

LEAVE A REPLY

Please enter your comment!
Please enter your name here