Mas o menos 60 hende a muri durante un atake di un grupo grandi di terorista na Parijs; Francia. Nan a cuminsa tira hende na luganan publico y tabatin varios explocion. Teroristanan tambe a tuma casi 100 persona rehen na e teatro Bataclan. Segun CNN te awor nan ta scuchando tiro y probablemente matando hende ainda. Den e teatro tabatin un concierto di un banda Mericano Eagles of Death Metal tumando luga, momento cu e atake a cuminsa. Polis a drenta e teatro pa caba cu e situacion bandi 7or (Aruba time). Tin 20 pa 30 rehen cu polis a logra di saca. Un ora despues polis a domina e situacion. Ultimo informacion 100 hende a muri den e teatro. Algo prome cu 9or autoridad ta bisa cu na total 118 hende a muri durante e atakenan. Bandi 10 or CNN a publica cu tin mas cu 150 cu a perda nan bida. Pero diasabra e cantidad a baha na 128 morto.
E atakenan ta concentra riba 6 luga te awor; un area turistico unda un terorista a cuminsa tira Stade de France unda tabatin un wega andando, teatro Bataclan, La Casa Nostra, Petit Cambodge Restaurant/Le Carillon Bar, Boulevard Voltaire y Belle Equipe Bar.
Riba e site di Daily Mail por mira mas potret y video. 11 hende a keda tira mata na e restaurant cerca e oficina di Charlie Hebdo unda aña pasa teroristanan a mata gran parti di e redaccion. Segun e fuente aki e teroristanan awe nochi a grita ‘esaki ta pa Siria’ ora di tira hende mata cu arma automatico (Kalashnikovs). Tambe ta menciona cu terorista a comete suicido cu bom.
E presidente di Francia a declara estado di emergencia na e ciudad principal di Francia y tambe laga cera tur frontera. Tambe autoridad a avisa ciudadanonan di Parijs pa no sali riba caya.
E video aki ta di hende saliendo di e teatro Bataclan, scapando nan bida.
E video aki ta mustra e situacion riba caya.
Riba e video aki por scucha explosion, durante e wega di futbol entre Francia y Alemania na Stade de France
