Appel di oro

E ballroom di Hyatt Regency Hotel & Casino, decora cu appelnan riba mesa, a keda chikito pa e cantidad di docentenan hunto cu nan famia  cu a bisti nan mes di gala pa celebra e culminacion di e luna di Enseñansa, e entrega di e ‘Appel di Oro’ na varios actor den Enseñansa na Aruba, entre otro, maestronan, docentenan, cabesantenan y actornan di sosten.

Durante e luna di augustus, Ministerio di Enseñansa hunto cu Departamento di Enseñansa a anuncia e proceso pa nominacion y tur e diferente categorianan di Appel di Oro. Un total di 64 nominacion den varios categoria a drenta. Un comision special, integra pa representantenan di Inspectie di Aruba, Departamento di Enseñansa, Banco Central di Aruba, Parlamento Hubenil y Ministerio di Enseñansa a wordo instala y seleccion di e ganadonan tabata completamente nan tarea.  

“Un anochi espectacular, no pasobra nos ta dunando premio pero sigur pa motibo cu e anochi aki ta muestra di un reflexion di sentimento di orguyo cu ta reina awe den presencia di tur e nominadonan. Tur esunnan cu ta aki presente awe a para hunto y uni pa demostra kico ta e trabao di un docente y su balor. Mi por a sinti e euforia y aceptacion di nos comunidad pa cu e nominadonan y esunnan cu a gana e premio di Appel di Oro awe. Nan ta personanan cu ta traha den e industria di speransa, ta traspasa e sentimento aki na nos hobennan cu tin speransa pa un miho futuro”, na palabra Minister di Enseñansa Michelle Hooyboer-Winklaar. E ta den e capacidad y ta encarga cu esunnan cu cada dia ta haci un esfuerso pa hiba nos isla na balornan inmenso dor di nan trabao incansabel di siña e mucha, e hoben y e adulto cu conocemento ta algo valioso y cu a base di esaki bo por sigui pasa e yabi cu ta yuda nos cu un miho futuro, danki na enseñansa.

Durante su discurso Minister Hooyboer-Winklaar a splica e motibo tras di un anochi asina, “Nos sa tambe, cu no ta solamente e 64 persona presente awe nochi cu ta haciendo trabounan excelente den enseñansa, y tin hopi educador dunando nan maximo esfuerso cada dia. E pregunta ta e ora, pa kico organisa premionan asina, si tin hopi hende cu merece? E contesta ta simpel. Boso como educador tin e oportunidad awe nochi pa manda e mensahe na nos hobennan bisando “Its ok to shine”. Boso por resalta, sin kita nada  for di ningun hende. Rindiendo honor na algun persona cu ta resalta, ta habri porta pa mas reconocimento y mas conscientisacion pa loke ta e trabou di maestro, cabesante y actor di sosten. “ , E mandatario a enfatisa.

“Mi ta hopi contento y esaki ta solamente e comienso y mehora y celebra e cosnan cu ta bay bon y colabora. Esey ta algo cu a resalta den tur discurso durante henter e luna di enseñansa”, Minister Michelle Hooyboer Winklaar ta sigui splica. “Y awe mi por a sinti cu en berdad tin e gana di supera, e gana di colabora y e tempo y e situacion rond di nos ta conduci na esaki”.

Durante e celebracion e ganadonan a comparti diferente storianan y mensahenan yen di inspiracion. Un di e presentadonan di e categoria Actor di Sosten tabata Zizi Nais, un mucha muhe cu mester a amputa su man algun aña pasa. E proyecto di scol ganado tabata esunnan di International School of Aruba cu a crea un man sintetico pa Zizi, uzando un 3D printer. Un storia cu a causa hopi impacto den hopi hende den e sala.

Minister Michelle Hooyboer–Winklaar ta hopi orguyoso di e seleccion di ganadonan cu ta docentenan cu a sa di resalta y destaca enormemente den nan ramo di experticio y ta gradici tur esunnan cu a haci esaki posibel.

Actor di Sosten:
Actor di Sosten Enseñansa Primario: Saskia Elgin-Maclean, Pius X School,
Actor di Sosten Enseñansa Secundario:Ingrid van der Linden, EPB San Nicolas
Actor di Sosten Enseñansa Special:Joally Lake, Emmaschool

Newcomer Of The Year:
Newcomer of the Year, Enseñansa Primario:David Simon, Scol Primario Washington
Newcomer of the Year, Enseñansa Secundario:Rolf van der Zanden, Colegio Arubano.

Maestro di Aña
Maestro di Aña Enseñansa Primario:Murielle Brown-Roos, Mon Plaisir College
Maestro di Aña Enseñansa Secundario: Jose Minguel Donata, Colegio San Nicolas.
Maestro di Aña Enseñansa Special: Evy Raven, Paso pa Futuro.
Maestro di Aña Enseñansa Superior:Thais Nierop, Universidad di Aruba

Cabesante di Scol
Cabesante di Aña Enseñansa Primario: Janine Soliana-Fingal, Colegio Santa Theresita,
Cabesante di Aña Enseñansa Secundario:Frank Mulders, Avond Havo
Cabesante di Aña Enseñansa Special:Joselyne Oduber, Emmaschool
Cabesante di Aña Enseñansa Superior:Glenn Godijn, Academy of Fine Arts and Design Aruba (Rietveld Academie)

Proyecto den Scol
Proyecto den Scol Enseñansa Primario: Colegio Frere Bonifacius, proyecto iPad den scol
Proyecto den Scol Enseñansa Secundario: International School of Aruba, 3D Hand Printing Project
Proyecto den Scol Enseñansa Special: Scol Scucha Nos, Proyecto di Conscientisacion Cochleair Implantaat

Lifetime achievement
Pa completa e anochi cu broche de oro, na final a eligi esun cu mas a destaca den su trayectorio di bida como docente cu e Lifetime Achievement Award y esaki a bay merecidamente pa ex rector di Colegio San Nicolas, Nigel Mathew. Cu a hiba un speech elocuente y a splica e esencia di ta un docente na unda e mucha semper mester keda central y trata na drecha e convivencia di e mucha y señala si tin fayonan pa no laga cicatriz permanente atras den e bida di e mucha.

Minister Michelle Hooyboer – Winklaar a remarca cu pa 2016 e ta premira mas categorianan na unda Aruba por elogia, distingui y premia su miho docentenan pa nan trabao incansabel di hiba e chikitinnan, e hobennan y esunnan di edad cu ta studia na nivelnan superior den bida.

 

LEAVE A REPLY

Please enter your comment!
Please enter your name here