sindicato uni

Un total di 12 sindicato a sinta na mesa pa cuminsa trece e union bek mirando desaroyonan no positivo cu ta  pasando cu nos pais tanto den sector publico como sector priva. E union aki ta wordo yama Union Sindical di Aruba. Falta confirmacion definitivo di solamente dos of tres sindicato, Segun Hubert Dirksz a splica.

Sr. Dirksz ta splica cu a yama un reunion cu tur sindicato y tambe a presenta 12 sindicato, algun cu tabata presente den e reunion anterior no por tabata presente, sinembargo na su luga a bin tres mas cual na su opinion ta hopi importante. “Mi ta kere cu esaki ta un indicacion cu sindicatonan ta dispuesto pa traha cu otro y tin preocupacionnan di trahado cu mester wordo atendi. Pa e sindicato aki, ya nos a dicidi riba un nomber cu ta Union Sindical di Aruba, y pronto nos ta tene un rueda di prensa pa duna mas informacion di kico ta e posicion di e sindicato. Nos a discuti riba e reglanan di wega di e organisacion aki caba y pa nos para firme y fuerte pa sali na defensa di e clase trahado.

A puntra Sr. Dirksz kico a palabra riba ora cu tin diferencia di opinion entre e diferente sindicatonan miembro di e union y si esaki tuma luga tambe mester sinta na mesa pa resolve. El a bisa cu esey ta corecto, a palabra con ta trata cu diferencia di opinion y sigur con ta atende cu gobierno y tur locual ta encera e clase trahado. A puntra tambe kico ta e prome preocupacionnan cu ta bay trece na mesa, el a bisa cu otro siman lo amplia riba e desaroyonan. “Nos tin bastante preocupacion di tur e sindicatonan y principalmente pa e trahamento hunto. Nos por a discuti ampliamente y esey ta yuda pa nos ta bastante fuerte para como union. Y e punto cu a wordo treci dilanti mas tanto ta riba e futuro di e union sindical y e futuro di e diferente situacionnan, basa riba e situacion na Aruba cu nos no por warda pa nan keda sin wordo atendi den nomber di e sindicatonan.”

Terminando Sr. Dirksz a bisa cu tur sindicato a wordo acerca. Mientras cu tabata den reunion a tuma contacto cu otronan cu no tabata presente tambe. “Nos sa tin algun sindicato cu situacion interno dificil cual ta haci cu no tin contesta definitivo, pero te cu aworaki por bisa cu 3 of 2 sindicato so mester duna contesta definitivo. Lo demas tur di nan a duna aprobacion di forma parti di Union Sindical di Aruba,” Sr. Dirksz a finalisa bisando.

 

LEAVE A REPLY

Please enter your comment!
Please enter your name here