Mas cu 150 ehecutivo a forma parti di e encuesta haci pa Banco Central di Aruba (BCA), titula Isla Innovativo. 66% ta kere cu den proximo 5 ana monedanan digital lo forma parti di e paisahe di pago.
Segun BCA, e resultadonan ta esencial pa mehora productividad y desaroyo economico di nos isla. Na e momento aki nan ta enfocando riba e resultadonan di transaccionnan financiero.
Den un relato nan ta splica cu segun e encuesta casi tur compania (95%) tin un cuenta di deposito na un banco local. Sin embargo, menos cu mita di e negoshinan (48%) a informa di tin un cuenta di seguro of un cuenta di prestamo local (35%). Alabes mayoria di e companianan local (57%) a indica cu e ta sumamente dificil pa haya acceso na capital financiero. Notabel ta cu inclusion financiero di empresanan chikito y nobo ta keda un reto, e relato ta splica.
“Ademas, solamente 1 den cada 4 empresa ta experiencia transaccionnan financiero sin friccion y di forma eficiente. Mientras 40% di e ehecutivonan ta considera pagonan inter-bancario facil, menos cu un tercer parti ta indica cu haci y ricibi pagonan como algo facil. Un averahe di 21% di negoshinan ta haci uzo di pagamento digital, y un 8% ta propietario di un cartera digital.
Pa mayoria di e negoshinan, pagamento door di credit of debit card ta domina, cu 1 den 4 consumidor pagando cash. Den termino di expectativanan, 66% di e ehecutivonan ta kere cu monedanan digital lo forma parti di e paisahe di pago Arubano den e proximo 5 aña.”
BCA ta conclui nan relato splicando cu ;o bay organisa mas tayer di innovacion pa stakeholder nan y den colaboracion lo traha riba un vision pa futuro innovacion den e lunanan venidero.
