Ayera 80 bicicleta pa e bunita proyecto escolar ‘Hiba Bicicleta den Enseñansa’, a wordo horta.

Ayera tardi, Minister di Enseñansa, Ciencia y Desaroyo Sostenibel, Rudy Lampe a divulga e caso di hortamento aki, durante un acto di otorgamento di certificado di Enseñansa pa Empleo pa e curso: Con pa traha cu calki, organisa pa Stichting Monumenten Fonds Aruba (SMFA).

E mandatario a haci uzo di e frase: “Nos ta comparti e mesun dolor, pero nos ta comparti e mesun speransa.” El a splica cu nan ta comparti e mesun dolor debi cu fundacion SMFA tambe a bira victima di hortamento di instrumentonan cu ta wordo uza pa restaura e forno di calki di Rancho.

Lampe a bisa cu e dolor cu e ta comparti tin di haci cu e hortamento di 80 bicicleta. E bicicletanan aki tabata destina pa e proyecto singular ‘Hiba Bicicleta den Enseñansa’, y nan tur a wordo horta.

Den e caso di SMFA e ta mira tambe cu den cuadro di un bunita proyecto pa restaura e monumento historico di forno cu tin den Rancho, a wordo organisa un curso con pa traha cu calki y restauracion di monumentonan, caminda a horta tur e materialnan y instrumentonan cu a wordo uza pa e curso aki.

“Den berdad e ta un dolor, pero den e mesun momento nos ta ruman di speransa, pasobra nos no ta give up,” el a bisa.

A pesar di e contratiempo aki tur dos proyecto lo sigui riba e mesun meta, ya cu e causa ta uno bon, segun e mandatario. Lampe a declara cu e proyecto piloto ‘Hiba Bicicleta den Enseñansa’, lo continua inicialmente den cuater scol.

E mandatario a keda impresiona pa e cantidad di participantenan cu a mustra interes den e curso organisa pa SMFA, caminda tambe sernan femenino a participa den un curso cu tin di haber cu construccion, unda normalmente nos ta pensa riba hende homber so.

El a felicita tur e instancianan cu tabata envolvi pa organisa e curso aki, y tambe e participantenan cu a ricibi un certificado di Enseñansa pa Empleo cu ta resorta den su ministerio. El a referi na e palabra di e director di SMFA, Anne Witsenburg, kende a yega di expresa cu e certificado di Enseñansa pa Empleo ta duna un balor y un reconocimento di parti di pais Aruba pa tur esunnan cu a participa den e curso aki.

 

LEAVE A REPLY

Please enter your comment!
Please enter your name here