Ayera miembronan di Recherche a dicidi bay den accion pa e mesun problema di contaminacion di beskem di biaha pasa cu nan a bay den accion.

Presidente di Sindicato di Polis Aruba (SPA), Jose Dirksz a declara cu nan a dicidi para pafo di e edificio na Warda di Santa Cruz pa un accion di dos ora pa mustra nan malcontento. Accion locual a yega mesora na atencion di e minister di Husticia, Andin Bikker kende despues di un conferencia di prensa na Bestuurskantoor a dicidi di bay reuni cu nan.

Dirksz a aclara cu e accion di ayera no tin nada di haci cu esun cu nan a yega di anuncia pa awe tocante asunto di indexering cu ta conta pa tur miembro di polis.

Esaki ta e di dos accion cu miembronan di Recherche ta realisa pa haya atencion di gobierno, ya cu nan salud ta bay na prome luga, pero tambe e servicio pueblo cada dia ta deteriorando. E servicio ta bira menos, mientras cu e criminalidad ta sigui keto bay, pero tambe e trabou ta keda subi mas pa nan. Tambe departamento di Recherche di Playa tin problema cu airco, y e trabou ta keda bay atras, mientras cu no tin niun solucion.

E intencion di e accion aki tabata pa gobierno tuma nan mas na serio, segun presidente di STA. Pero tambe pa pueblo tene comprension cu nan kier cumpli cu nan trabou, pero practicamente nan man y pia ta mara, segun presidente di SPA.

A pesar cu e mandatario a duna su palabra cu e edificio na Wayaca lo ta cla pronto pa aloca nan, te ainda esaki no a pasa. Y nan ta mirando cu luna di december ta yegando caminda trabou di construccion ta bay para, y te ainda no tin un solucion concreto.

SPA lo sigui cu mas accion, si gobierno no ta atende debidamente cu e situacion cu cuerpo di polis ta pasando aden.

 

LEAVE A REPLY

Please enter your comment!
Please enter your name here