Cerca ministerio di Salubridad Publico, Medio Ambiente y Naturalesa actualmente tin 9 peticion concreto, cual ta inclui plan di negoshi, pa pidi permiso relaciona cu cannabis medicinal. No ta trata solamente cultivo, y tin indicacion cu lo por duna entre 400 y 700 persona trabou y cu gobierno lo conta riba 60 miyon florin den cashi pa comienso di operacion.

Asina hefe di gabinete Alvin Daal, trahando pa minister Suzy Camelia-Römer, ta indica. “Ta trata aki di 9 plan di negoshi serio cu hasta ta tene consideracion cu aspectonan manera siguridad y personal. Den e plannan ta indica cu lo por ofrece 400 pa 700 persona trabou y cu gobierno lo haya den solamente inkomstenbelasting y loonbelasting un – pues no incluyendo impuesto riba ganashi – un 60 miyon florin na comienso di operacion.”

Segun Daal e no ta trata solamente cultivo di cannabis, si no tambe e otorgamento di permisonan pa companianan di cultivo, pero tambe companianan cu ta procesa; ta trata di e secamento, cortamento, un fabrica cu ta produci medicina y tambe por ehempel un instituto di investigacion cientifico. E inversionistanan ta Curasoleño, pero nan ta traha hunto cu companianan Canades, Mericano y Hulandes cu ya caba ta den e industria.

Daal, despues di a bay Jamaica pa un conferencia riba cannabis medicinal, a bisa cu ‘nos mester pura, si no otro islanan ta pasa laga nos bay’. E proyecto di ley pa legalisa cannabis medicinal a pasa bou loep di e comision central di parlamento. Daal ta indica cu a sigui mayoria conseho di Raad van Advies (RvA) y cu lo manda e concepto nobo ora esaki ta cla. Riba un di RvA su puntonan nan no a bay den detaye. Esaki ta encera e aspecto financiero, cual prome cu a haya indicacion di cuanto permiso a entrega, e ministerio no por a sa con pa detaya. “Despues cu esaki pasa su proceso nos por premira cu den november lo por cuminsa otorga permisonan”, Daal a indica.

 

LEAVE A REPLY

Please enter your comment!
Please enter your name here