E mayor Reginald Danies conoci pa su lucha contra abuso di mucha ta den noticia atrobe. Siman pasa den un entrevista controversial na Canal 22 el a trece dilanti cu e tabata esun cu a sconde e criminal Ospino Span. Sr. Danies ta bisa Bon Dia Aruba awor cu el a wanta e informacion aki pasobra polis y politica ‘a trata mi den un forma sushi’.

“Mi a wanta e informacion aki pasobra nan a trata mi den un forma sushi, nan no a pasa mi pa Ministerio Publico y haci nada di esey. Esey a mustra mi cu polis y politica ta sushi anto esey a pone mi hala atras.” Mirando cu el a haya su mes den un lucha contra abuso di mucha, sr. Danies ta bisa cu e ta mira cu te ainda hopi hende no ta compronde su meta y ta keda husg’e.

“Mi a bisa cu mi a cambia mi bida. Hopi hende ta wak dread y ta pensa cu ta pipa mi tabata huma y hala coca cu e cosnan ey. Despues di e cuenta di Bushiribana cu hende ta critica cu awo ta bay verf henter Aruba, mi a sinti mi mester mustra nan for di unda mi ta bin di berdad.” E ta sigui bisa nos cu el a duna Aruba ‘huiswerk’ pa nan sigui bay studia en bes di perde tempo cu ne pasobra tin cosnan mas grandi ta pasando riba nos pais. “Un meta so mi tin cual ta pa cambia ley di mucha.

Tanten abo ta un hende cu no a sinta cu fiscal, bo ta zwak y bo no sa nada di kico ta pasando. P’esey ami no ta worry cu hende pa mi yega unda cu mi tin cu yega pa e muchanan.” Bon Dia Aruba no a logra comunica cu instancianan concerni pa un reaccion riba e declaracionnanmenciona.

Ospino Span
Durante su entrevista na television, sr. Danies ta splica cu e a sconde e preso Johannes Ospino Span na su cas despues cu e criminal aki a tira e atraconan di banco. E tabata purbando pa yuda saca sr. Ospino for di Aruba pero esaki no a logra. “Ya caba polis tabata tin basta dia pidiendo pa Ospino anto nan ta entregando 10.000 florin. Ospino tabata bisa mi pa wak si tal persona por sak’e for di Aruba pero ningun hende por a yuda,” sr. Danies ta bisa. Segun e, sr. Ospino conta cu el a comete e atraconan na banco pasobra su bida tabata na peliger y e tabata debe hopi placa. E amistad entre sr. Danies y sr. Ospino a yega na su fin ora cu sr. Ospino a confesa cu a laga mata un Arubiano inocentemente pa paga e debenan cu e tabata tin. Sr. Danies ta bisa cu el a presenta despues na Cas di Partido AVP y comparti e caso aki cu varios politico pasobra e no kier a bay polis.

Declaracionnan
E ta bisa cu hefe di polis a ofrece 10 mil florin pa entrega sr. Ospino y nan tabata kier a sa pakico no a bin na polis prome, sino cu a bay na cas di partido AVP cu e informacion. “Ami no ta guy di polis. Si mi tabata kier 10 mil florin, lo mi a bay polis cu esaki.” Sr. Danies ta sigui bisa cu su meta principal tabata pa hala atencion di gobierno hunto cu su ministernan riba cosnan corupto pasando den gobierno. Pero nan a lag’e mustra como un ‘sapo’. Recherchenan kier a cera un deal pa sr. Danies informa nan unda tin kilonan di droga pero e ta bisa cu el a rechasa esey pasobra e no mester di placa. E tambe ta sigui bisa cu despues di un tempo, el a logra haya un reunion cu minister di Husticia Arthur Dowers y a bis’e cu Otmar Oduber mester wordo persigui pa actonan ilegal cu el a comete. Esaki a base di informacion cu el a haya riba asunto di ‘proyecto di Strawberry’. Segun sr. Danies, minister Dowers a ofrece un trabou pa e keda keto.

Reaccion Otmar Oduber
Den un reaccion corto, Otmar Oduber ta bisa Bon Dia Aruba: “Ridicules! OM y Landsrecherche ya caba a haci un investigacion profundo unda no a constata nada iregular. Esaki a keda anuncia oficialmente den un carta di PG dos aña pasa. Ta lamenta cu ta hinca e asunto aki den politica di un nivel hopi baho. Loke Ministerio Publico a investiga ta si tin algo cu a bay robes of no cu e proyecto di lechuga. Tur hende ta yam’e di ‘strawberry’ pero ta di lechuga e tabata ta e tempo ey. A laga investiga tur cos y e tempo ey MEP a bay OM y esey ta loke a bin afo.” Bon Dia Aruba a busca un reaccion di minister Dowers por medio di diferente coordinador, pero a comprende for di nan cu nan no ta logra haya e mandatario.

Politica
Sr. Danies ta sigui bisa cu te ainda e mes no a haya ningun reaccion despues di a bin dilanti cu tur esaki. “Pa colmo mi ta mira media bay te den KIA pa busca informacion di Ospino. Ban cambia e panorama awo: si por ehempel un Speed Andrade – cu sa cu mi ta luchando pa e muchanan tres aña caba – lo mester a pone energia positivo pa yuda mi logra, awe mi lo a logra caba.” Sr. Danies ta haya fastioso pakico media no ta bay puntra minister Dowers y tur otronan cu e ta menciona pa puntranan si ta berdad y ta keda bay na Ospino so pa un reaccion. “Hende ta keda liga mi na partido politico awo. Ami ta un meta so mi tin anto fiscalnan a bisa mi caba cu e meta cu mi tin, politicamente bo no ta logr’e. Si Aruba lanta for di soño manera mi kier pa nan lanta, e dia ey nos ta logra. ”

Reaccion sr. Ospino
Sr. Ospino a reacciona na tur esaki caba y ta bisa cu a comete erornan den bida pero cu esaki no ta un noticia nobo. El a expresa den prensa cu e accion di sr. Danies ta manera ‘satanas ta uza medionan pa expresa su maldad’.