Revitalisacion di Oranjestad y San Nicolas ta un parti importante den e aspecto di maneho economico di Gabinete AVP-FUTURO. Esaki ta ser demostra den splicacion detaya di nan strategia y plan den nan programa di gobernacion.

Pa revitalisa Oranjestad, gobierno tin como meta concretisa y implementa e vision pa Oranjestad segun e proyecto den Landspakket pa desaroyo di centro di Oranjestad; lo sondea con por converti Oranjestad den un zona liber; y lo crea atraccionnan alternativo y evalua cambionan di ROPV.

Tambe tin plan pa amplia parkeer, iluminacion, seguridad y accesibilidad den henter ciudad; implementa un pakete di incentivo fiscal pa stimula inversion den edificio; implementa un pakete di incentivo fiscal pa stimula inversion den sector di vivienda y cuido di adultonan mayor; y introduccion di incentivo fiscal pa atrae inversion y establecimento di institucionnan educacional avansa priva den area di Ciencia, Tecnologia, Ingenieria y Matematica.

Ademas di esaki Gabinete AVP-FUTURO lo introduci un subsidio di huur pa stimula vivienda riba e di dos piso di edificio; specialmente pa studiante, hoben profesional y adulto mayor; lo implementa un maneho di parkeer na beneficio di habitante, comercio, cliente bishitantenan di Oranjestad; y lo renoba centro di Oranjestad y barionan rond di Oranjestad pa crea areanan bunita pa vivienda, comercio y recreacion, cu ta inclui renobacion di caya, luz, mata y facilidad pa sinta, baño publico y baki pa tira sushi.

Gobierno tin meta pa implementa un maneho di precario pa centro di Oranjestad y San Nicolas, pa stimula actividad comercial y recreo, cu alabes ta duna claridad riba uso di espacio publico y seguridad na comerciantenan cu tin un edificio y esunnan cu ta pidi pa usa un espacio publico pa nan negoshi (mobiel).

Den esaki tambe gobierno lo percura pa limpiesa, mantencion, entretenimento y mercadeo pa Oranjestad como centro comercial, di vivienda y recreo; lo renoba e area y barionan rond di centro di Oranjestad, manera Lagoen, Dakota, Rancho, Companashi y Socotoro; lo stimula pa huur e di dos piso di e edificia na studiante y hobennan cu kier biba y traha den centro di ciudad; y lo stimula e renobacion di edificionan bandona den centro di Oranjestad, incluso monumentonan y nan uso pa sector priva.

Ademas gobierno lo reintroduci e maneho pa stop presencia di adicto ambulante riba caya den centro di Oranjestad of persona cu a haya nan mes forsa pa biba y drumi riba caya y percura pa facilidad pa e personanan aki por rehabilita y biba un bida digno y productivo; y lo aumenta presencia di polis den centro di Oranjestad pa tin seguridad continuo pa tur ciudadano, bishitante y empresario.

Pa Gabinete AVP-FUTURO San Nicolas no ta djis un ciudad. P’esey ta papia di “pariba di brug” y cu esey ta referi na henter e area pariba di e brug nobo di Spaans Lagoen. Aunke cu centro di San Nicolas mester haya atencion lihe, pa e gobierno nobo ta importante pa e revitalisacion di San Nicolas bay man den man cu iniciativa pa henter e area “pariba di brug”.

Pa e motibo aki gobierno lo desaroya un plan integral pa “pariba di brug, e centro di San Nicolas y barionan den vecindario manera: Pos Chikito, Mabon, Brazil, Cura Cabay, e area rond di centro di San Nicolas: Esso Heights, Lago Heights, Juana Morto, Sero Colorado cu Baby Beach y Rodger’s Beach.

E plan integral aki lo mester inclui plan pa desaroyo economico, di comercio, vivienda, bida social, cultural y educacion, a corto y largo plaso. E necesidad di un plan integral asina ta pa haci uso maximo di e oportunidadnan nobo cu a surgi den e periodo post-refineria y di e donacion cu lo mester haci disponible na corto y largo plaso pa ehecucion di e desaroyo di “pariba di brug” y San Nicolas en particular.

Den e plan integral aki lo haci bon uso di plannan existente y desaroyonan andando, despues di evalua esakinan den cuadro di e desaroyo na largo plaso y e economia y desaroyo inclusivo cu gabinete AVP-FUTURO ta bay implementa.

E plan integral pa desaroyo di San Nicolas y pariba di brug lo inclui, entre otro, un plan di renobacion pa San Nicolas y vecindario; e proyecto di Revitalisacion San Nicolas Fase 1 cu entre otro, embeyecemento di e area rond di postkantoor, construccion di un “Farmer’s Market”, renobacion di Arubus y construccion di un speeltuin publico; y lo evalua e proyecto den un Landspakket pa desaroyo economico di centro di San Nicolas.

Gobierno tin como meta implementa incentivo fiscal pa atrae inversionista pa renoba e edificionan comercial den caya principal y pa atrae mas desaroyo economico den centro di ciudad, riba e tereno di refineria y den barionan rond di San Nicolas; y lo stimula creacion di fondo cu interes reduci entre gobierno y sector bancario pa financia e renobacion di San Nicolas y pariba di brug.

Ademas di esaki Gabinete AVP-FUTURO lo conecta e centro di San Nicolas cu lama y inicia e desaroyo economico di 100.000m2 di tereno di refineria, for di e rotonde di Nicolas Store te cu lama y crea un boardwalk manera Linear Park, un pier di piscado pa uso recreativo y un waf di yate luhoso.

E plan ta conta tambe cu incorporacion di un compania estatal cu lo adkiri parti di e terenonan di RDA pa desaroyo economico pa San Nicolas; ubicacion di un area specifico pa e zona di prostitucion of red light district y aplica ley pa limita presencia di e trahadonan aki riba tereno publico; y lo tin construccion di un waf pa carga di y pa e region, manera Corsou, Boneiro, Surinam, Colombia y Republica Dominicana. Tambe pa un fast ferry y eventualmente tambe pa crucero.