Oficialmente a firma e contrato cu un contratista, pa e renobacion di Centro di Bario Tanki Leendert. Durante e lansamento oficial aki, e representantenan di e Centro di Bario Tanki Leendert, CEDE ARUBA, Representantenan di Hulanda na Aruba (VNO), advies bureau Mer-Cann y compania di construccion De Spijker, a yega hunto pa firma e acuerdo inicial na e trabaonan.

E renobacion ta parti di e programa BARIO UNICO, cu tin un colaboracion strategico entre Gobierno di Aruba, CEDE ARUBA, organisacionnan local y fondonan for di Hulanda. E meta: ta pa fortifica e centro di bario manera un pilar pa bienestar, participacion comunitario y traha un comunidad fuerte den e bario.

Mas espacio pa encuentro y desaroyo
 Tanki Leendert ta un di e barionan mas grandi na Aruba cu un poblacion diverso. E centro di bario a sirbi como un lugar importante pa encuentro pa mas cu un decada, pero den ultimo añanan a drenta den un estado deteriora. Ta danki na un combinacion di un subsidio for di Ministerio di Asunto Interno y di Relacionnan di Reino di Hulanda (BZK) y un contribucion considerabel di CEDE ARUBA mes, e situacion lo bay mehora.

E renobacion planea ta enfoca riba lo siguiente:
• Renobacion di e dak, plafond, bentana, porta y bañonan,
• Mehora coriente, luz y verf parti paden y pafor di e edificio,
• Mehora facilidadnan di cushina y kleedkamers,
• Renoba facilidadnan di e patio pafo.

E renobacion lo tuma lugar den fase pa e centro por keda parcialmente habri pa e comunidad. E entrega final di e proyecto ta planea pa september 2025.

Renobacion di e edificio lo crea mas oportunidad pa e bario
 Cu e infrastructura nobo aki, lo tin mas posibilidad pa desaroya programanan nobo. CEDE ARUBA y e directiva di Centro di Bario Tanki Leendert lo traha hunto pa fortifica e directiva, lo busca boluntarionan nobo y lo crea un agenda di actividad inclusivo pa hoben y mayornan.

Daniel Tecklenborg, director di CEDE ARUBA: “Antes tabata un reto grandi pa por yega na haci renobacionnan, awor nos por mira e resultado ora tin colaboracion structura. Awor centronan di bario por ricibi mas sosten y colaboracion cu nan ta merece. E proyecto aki ta mustra kico ta posibel ora instancianan local manera CEDE ARUBA, cu apoyo di Gobierno di Aruba y Ministerionan di Hulanda traha hunto.”

Directiva di Centro di Bario Tanki Leendert: “Aunke e sociedad a cambia cu tempo, e necesidadnan basico di nos comunidad a keda mescos. cu e renobacion di e edificio, nos ta spera pa no solamente fortifica e infrastructura, pero tambe pa stimula conscientisacion social y compromiso di e comunidad den nos bario. Nos ta spera cu e centro lo keda un lugar caminda hende por sinti nan bon bini, cu nan lo por wordo scucha y trece e union desea, sin importa e tempo actual.”

Cambio structural
 E renobacion di Centro di Bario Tanki Leendert no ta un caso apart. E ta forma parti di un strategia mas amplio pa fortifica centronan di bario den henter Aruba. Danki na programa manera BARIO UNICO, cu organisacionnan local ta ricibi sosten riba nivel di bon gobernacion, desaroyo di capacidad y finansas structural. E contribucion temporal di BZK na CEDE ARUBA a representa un paso importante pa centro di bario Tanki Leendert

E speransa ta cu otro centronan di bario tambe por ricibi e oportunidad pa renoba y modernisa nan instalacionnan, pa nan por sirbi un grupo mas amplio di hende. Pasobra un centro di bario fuerte, ta nifica un comunidad fuerte.