Fundacion Siñami Paso pa Paso Aruba, activo desde 2009 den acompañamento y guia integral di mucha, hoben y nan famia, ta anuncia e organisacion di e Intensive Professional Certificate Program in Mild Intellectual Disability (LVB), cu lo tuma luga na Aruba di 16 te cu 27 di november 2026.

Desde su inicio, e fundacion ta brinda acompañamento interdisciplinario, cu e participacion di un ekipo di profesional cualifica den diferente area. E ekipo ta consisti di Sra. Lic. Maria Cristina Harsveld, logopedista / pedagogia infantil; Sra. Dr. Tiara Calvo, medico; Sra. Lic. Claudia Villamizar, psicologa; Sra. Yaxzully Toyo, MSc., psicologo infantil; Sra. Natalia Garcia, MSc., neuropsicologa; Sra. Stephania Espitia, MSc., psicologo clinico; y Sr. Carlos Falla, MSc. neuropedagogo.

E acercamento interdisciplinario di Fundacion Siñami Paso pa Paso Aruba ta enfoca riba comprension di e necesidadnan individual di cada persona, e identificacion y desaroyo di nan capacidad, y e fortalecemento di nan bienestar integral. Ademas, e fundacion ta promove inclusion y participacion activa den comunidad, cu e meta di contribui na un desaroyo mas pleno y na un mihor calidad di bida pa cada persona y su famia.

Como parti di su compromiso continuo cu excelencia den atencion y desaroyo profesional, Fundacion Siñami Paso pa Paso Aruba a desaroya LVB-Kenniscentrum Aruba, un iniciativa cu ta reuni diferente profesional y organisacion pa promove intercambio di conocemento, investigacion y capacitacion specialisa den relacion cu persona cu discapacidad intelectual leve (LVB) y persona cu funcionamento intelectual limite.

Cu e organisacion di e Intensive Professional Certificate Program in Mild Intellectual Disability (LVB), e fundacion ta sigui fortalece su compromiso cu formacion profesional, ampliacion di conocimiento y desaroyo di competencia specialisa. E iniciativa aki ta contribui na un mihor comprension di e necesidad di e grupo meta y na e promocion di un acercamento mas inclusivo, profesional y adapta na nan necesidad.

LVB-Kenniscentrum Aruba: conocemento, investigacion y capacitacion

LVB-Kenniscentrum Aruba tin como meta principal fortalece e conocemento y capacidad profesional disponible na Aruba, a traves di tres area di accion:

1. Investigacion: Realisa investigacion tocante e situacion actual y necesidad di persona cu discapacidad intelectual leve na Aruba. (area Educacion, participacion social y inclusion, empleo y empleabilidad y embehecemento.

2. Desaroyo di material di apoyo: Elabora material informativo y educativo pa profesional y famia, cu atencion special na disponibilidad di informacion na papiamento.

3. Capacitacion profesional: Desaroya curso y programa di entrenamento enfoca riba tecnicanan practico y metodonan di intervencion fundamenta riba evidencia cientifico.

Cu e iniciativa aki, e fundacion ta busca crea un plataforma di colaboracion y intercambio di conocemento, cu por contribui na un meho comprension y acompañamento di e grupo di persona aki den nos comunidad.

Un programa academico fundamenta riba evidencia cientifico

E programa intensivo di november ta representa un paso concreto den e esfuerso di LVB-Kenniscentrum Aruba pa fortalece competencia di profesionalnan den sector di educacion, salud, social y laboral.

E capacitacion ta combina conocimiento teorico, investigacion cientifico, analisis di caso y workshopnan practico, cu en fasis riba aplicacion di metodonan internacional den e contexto educativo, clinico y social di Aruba. E meta ta pa profesionalnan por reconoce y comprende miho e necesidad especifico di un persona cu discapacidad intelectual leve, y ofrece intervencion y acompañamento adapta na nan capacidad y circunstancianan individual.

Contenido academico: temanan cu lo wordo trata

1. Introduccion na discapacidad intelectual leve y funcionamento adaptativo

Fundamentonan cientifico di discapacidad intelectual leve, evaluacion diagnostico, funcionamento adaptativo y implicacion pa educacion y acompañamento profesional.

2. Aplicacion di Metodo Yücel

Un workshop practico enfoca riba uso di Metodo Yücel den contexto profesional, incluyendo preparacion di participantenan pa usa e conocimiento aki.

3. Analisis explicativo den discapacidad intelectual

Un acercamento cu ta bay mas leu cu un diagnostico of etiqueta clinico, pa compronde e factornan cu ta influencia comportamento, funcionamento y necesidad di apoyo di cada persona.

4. Trauma y discapacidad intelectual leve

Reconocimiento di experiencia traumatico y comprension di e impacto cu trauma por tin riba comportamiento y bienestar emocional.

5. Comunicacion profesional y influencia efectivo

Desaroyo di estrategia di comunicacion constructivo y influencia positivo den relacionnan terapeutico, educativo y di acompañamento.

6. Explotacion y trafico di hende

Identificacion y comprension di riesgo di explotacion y trafico di hende cu por afecta persona cu discapacidad intelectual leve, y e implicacion pa proteccion y actuacion profesional.

7. Transicion di educacion pa empleo

Preparacion, inclusion laboral y acompañamento di hoben cu discapacidad intelectual leve den nan transicion for di sistema educativo pa mundo laboral, incluyendo e modelo Individual Placement and Support (IPS).

8. Cyberbullying y discapacidad intelectual leve

Analisis di intimidacion digital, vulnerabilidad online y e importancia di prevencion y acompañamento den contexto di Aruba.

9. Analisis di comportamento y Behavioral Skills Training

Un workshop practico di Train-the-Trainer, enfoca riba analisis di comportamento, modificacion di comportamento y desaroyo di habilidad profesional pa intervencion.

10. Mentalisacion y desaroyo socioemocional

Comprension di procesonan mental, emocionnan, relacionnan interpersonal y desaroyo socioemocional, cu atencion especial na necesidad di persona cu discapacidad intelectual leve.

Facilitadornan internacional di alto nivel academico

Un di e caracteristicanan principal di e programa ta e calidad academico y experiencia cientifico di su facilitadornan internacional, vincula na diferente universidad y institucion specialisa na Hulanda.

E programa lo ta bou di liderazgo academico di Prof. Dr. Xavier Moonen, profesor universitario y investigador specialisa den discapacidad intelectual, kende lo actua como facilitador principal y lo ta presente personalmente na Aruba pa guia e capacitacion y workshop.

E colaboracion cu Prof. Dr. Moonen tin su origen den 2024, ora cu el a dicta e prome curso online pa profesional na Aruba. Na 2025, el a bishita Aruba personalmente, unda el a haya oportunidad di conoce mas di cerca e realidad local y e necesidadnan di capacitacion den e tereno di discapacidad intelectual leve. Durante e bishita aki, el a dicta un curso intensivo di tres dia pa profesional di diferente disciplina.

Considerando e resultado positivo di e capacitacion anterior y e necesidad continuo di formacion specialisa, Prof. Dr. Moonen, den colaboracion cu Fundacion Siñami Paso pa Paso Aruba, a desaroya e programa academico di 2026. E programa aki ta representa un continuacion y ampliacion di e esfuerso pa fortalece conocemento cientifico y competencia profesional na Aruba.

Tambe Dr. Gabriëlle Mercera di Maastricht University, lo participa presencialmente na Aruba, compartiendo su conocemento y experiencia cientifico tocante trauma, vulnerabilidad, explotacion y trafico di hende den relacion cu persona cu discapacidad intelectual leve.

Fortalecemento di capacidad local y transferencia di conocemento

Un componente importante di e programa ta e enfoke Train-the-Trainer, cu ta prepara profesional pa aplica y transmiti e conocemento adkiri den nan propio organisacion y contexto laboral.

E acercamento aki ta contribui na sostenibilidad di capacitacion profesional, pasobra e conocemento no ta keda limita na e participante di e curso, sino por sigui wordo comparti y aplica.

Pa Fundacion Siñami Paso pa Paso Aruba y e iniciativa LVB-Kenniscentrum Aruba, e meta no ta solamente organisa un serie di curso, sino contribui na un proceso continuo di investigacion, profesionalisacion, sensibilisacion y fortalecimiento di e red di apoyo na persona cu discapacidad intelectual leve y nan famia.

Informacion di e programa

Fecha: 16 te cu 27 di november 2026

Horario general: 9:00 a.m. – 1:00 p.m. (horario di sesionnan individual por varia)

Lugar: Van Leeuwenhoekstraat 2, Oranjestad, Aruba (San Pedro di Verona).

Inscripcion: Participantenan por inscribi pa cursonan individual. Cupo ta limita.