(Curacao.nu) – Durante e prome edicion di e City Nature Challenge riba Corsou, a descubri un cadushi rondo inusual cu no a ser oficialmente observa riba e isla anteriormente. E descubrimento ta ser considera un di e resultadonan mas extraordinario di e evento di cuater dia, cu a mobilisa centenares di persona pa traha un mapa di e biodiversidad di e isla.
Entre 25 y 28 di april, participantenan a registra mas cu 10.000 observacion, cu ta abarca casi 1.200 diferente especie di mata, bestia y fungi, usando e applicacion gratis iNaturalist. Esaki a resulta den un record nobo di biodiversidad pa Corsou.
E Challenge a trece hende di tur edad y antecedente hunto: for di muchanan di scol te na duikdor, for di gruponan di canamento te na ministerionan di gobierno. Un total di diestres scol a participa den e proyecto di ciencia ciudadano. E organisacion ta den man di Nadina Galle, Femi Meaux y Cindy Eman. “E cadushi di bala ta enfatisa dicon ta asina valioso pa envolvi hende activamente den documenta nos naturalesa,” e ekipo nucleo ta bisa.
E City Nature Challenge ta un iniciativa mundial cu ta encurasha hende pa registra observacion di naturalesa den nan ambiente di biba. E datonan lo ser usa pa investigacion y conservacion di naturalesa. Corsou ya ta ansioso pa un di dos edicion na 2026.
