Recientemente Aruba Tourism Authority (ATA) y CEDE Aruba a firma un acuerdo di cooperacion cu e meta pa duna back na comunidad y di e mesun forma brinda bishitantenan di Aruba e oportunidad pa yega mas cerca di comunidad tambe.

Director di CEDE Aruba Daniel Tecklenborg a splica cu e organisacion t’ey pa yuda e iniciativanan di comunidad den diferente area. Den area di financiamento, buscamento di fondo, capacitacion di e organisacionnan, crea rednan colaborativo, abogacia, y tambe a traves di programanan cu nan ta ehecuta pa basta tempo caba, manera Aruba Doet, Aruba Volunteers, Bario Unico, Let’s Act y hopi mas.

El a sigui splica cu nan ta traha segun cuater pilar strategico cual ta enfoca riba empodera ciudadano, door di cual nan ta brinda gruponan den bario apoyo den varios area. Nan ta enfoca tambe riba bienestar comunitario y colaboracion den bario, por ehempel cu centronan di bario, organisacionnan di bario y NGO cu ta traha riba nivel nacional.

El a agrega cu nan ta enfoca tambe riba sosten na gruponan vulnerabel pa medio di diferente NGO cu ta haci proyectonan piloto nobo, y nan ta enfoca riba capacitacion di organisacionnan door di duna training y coaching na directivanan y na organisacionnan cu ta ehecuta proyecto.

Tecklenborg a indica cu CEDE Aruba ta traha cu un lista largo di colaboradornan caba, nan ta cu Gobierno di Aruba, Gobierno di Hulanda, cu varios fondo Hulandes, cu Union Europeo, diferente compania local y awor ATA tambe lo forma parti di e lista aki.

“Pa nos ATA ta un organisacion partner nobo hopi importante strategico pa haci mas impacto den nos comunidad. Mirando cu turismo ta e pilar principal economico nos ta haya hopi importante cu tin mas inversion tambe den e comunidad local y asina nos ta hopi contento cu nos por kick off e acuerdo aki,” el a remarca.

El a splica cu e acuerdo ta bay enfoca riba cuater programa principal cu ta participacion boluntario pa medio di Aruba Volunteers, programanan despues di scol pa hoben (youth after school programs), tambe e parti di corporate social responsability y e parti di eventonan den bario.

“Ta diferente area cu nos ta enfoca riba dje y mi ta kere cu e ta hopi importante pa mobilisa varios organisacion, varios hende den diferente bario pa medio di e colaboracion aki. Nos ta gradici ATA, pero tambe gobierno pa e confiansa. Nos ta kere nos ta bay haci un bunita trabou aki y nos lo informa comunidad riba tur programa y proyecto cu lo tuma luga,” el a indica.

CEO di ATA Ronella Croes a subraya cu pa ATA ta un honor pa nan por yega na e punto aki. El a conta cu tabata un trayecto cu a inicia algun aña pasa. El a remarca cu e intencion di tin un colaboracion cu CEDE no ta algo nobo, pues ta algo cu nan a bin ta evalua na varios ocasion. “E ta ainda mas bonita ora cu despues di asina hopi esfuerso ta yega na tin un palabracion y por formalisa esaki,” el a expresa.

Croes a enfatisa cu esaki ta algo importante pa ATA den parti di nan plan pa 2026, pero tambe nan plan corporativo multianual como oficina di turismo. El a splica cu nan tin delinea acuerdonan strategico cu diferente socio y e acuerdonan strategico aki ta un manera pa ATA eleva su esfuersonan riba diferente area, incluyendo proteccion di naturalesa y medio ambiente, pero tambe preservacion di cultura y promocion di esaki.

El a agrega cu den esaki por pensa tambe riba acuerdonan cu institutonan den e sector di educacion unda cu colaboracion asina aki por permiti nan pa duna un man pa forma e forsa laboral cu ta necesario den sector turistico.

Croes a remarca tambe cu acuerdonan strategico ta enfoca riba e parti social, pa trece turismo mas cerca di comunidad, pero tambe yuda di un manera of otro trece turismo mas ainda presente den mehoracion di calidad di bida, cual ta algo cu a bin dilanti na varios ocasion, incluyendo como parti di ATA su investigacion realisa aña pasa.

Y CEDE Aruba ta parti di e acuerdonan strategico cu ATA a bin ta traha riba dje.

Pa loke ta e programa cu acuerdo firma cu CEDE Aruba ta contene, Croes a splica cu tin diferente proyecto. Un di nan ta e parti di plataforma pa boluntarionan cu ta algo cu CEDE ya caba ta organisa. El a enfatisa cu nan kier duna mas realse na esaki, mas inventarisacion y posibilidadnan pa conecta boluntarionan cu diferente proyecto. Den esaki, el a indica, por pensa riba boluntarionan local, pero tambe boluntarionan cu ta bishita e isla.

El a menciona cu den e aspecto aki nan tin experiencia cu CEDE caba, caminda cu CEDE ta asisti ATA cu gruponan di bishitante cu ta bin Aruba y cu kier haci algo back pa comunidad, y ta un colaboracion cu nan ta contento cune tambe.

Croes a agrega cu pa duna realse na e proyecto aki no mester pensa ariba gruponan di bishitante so awor, pero pronto nan lo facilita e bishitante di tal manera cu e por sa tambe con e por duna back durante di su estadia. Cada individuo cu bishita, e 1.4 miyon mas o menos cu ta bishita via avion y tambe turistanan crucero, por haya miho informacion y por ser conecta pa asina drenta barionan, drenta comunidad y duna nan asistencia.

El a sigui splica cu e acuerdo ta encera tambe un programa cu tabata existi den pasado caba, cu ta ‘Happy to Give Back’. Esaki, el a menciona, ta bira e plataforma cu nan ta relansa bou di e acuerdo aki unda cu bishitantenan por haci un donacion y asina contribui mas ainda na comunidad di Aruba.

Otro proyecto bieu cu tambe ta forma parti di e acuerdo aki ta enfoca riba inversion den hubentud di Aruba, cual ta otro punto di enfoke pa ATA. E proyecto aki di programanan pa hoben despues di scol (youth after school programs) lo bay consisti di un minimo di 10 programa den un lapso di dos aña unda cu lo enfoca riba brinda na minimo 200 hoben e posibilidad pa desaroya nan mes mas personalmente, pero tambe inculca e sentimento di liderazgo bou di e hobennan.

Croes a indica cu e otro aspecto di e acuerdo ta naturalmente cu como ATA nan kier mira mas eventonan den barionan unda cu e bishitante por yega mas cerca, pero tambe e localnan por beneficia mas ainda di diferente manera pa medio di turismo.

E acuerdo ta consisti tambe di un minimo di cuater evento, y den esaki por pensa riba por ehempel festival di cuminda den bario, eventonan unda cu por expone artesania local, of tambe eventonan intercultural pa medio di otro componentenan.

E acuerdo entre ATA y CEDE Aruba ta pa dos aña y pa cual ATA a aloca 250 mil florin pa aña, cu ta un inversion total di mey miyon florin di fondo di turismo cu ta bay back pa comunidad pa medio di e vehiculo di ATA y den acuerdo y colaboracion cu e organisacion CEDE Aruba.

Potretnan: Facebook Aruba Tourism Authority