Recientemente nos ta tende hopi noticia over e hecho cu tin un scarsedad di trahador. Den e contexto aki varios instancia a indica cu mester ‘importa’ miles di trahador stranhero pa bin Aruba. Den mi opinion esaki lo bira un desaster social di magnitud inmenso. Den e columna aki nos lo discuti varios factor cu ta reenforsa mi opinion tocante e topico aki.

Carrying Capacity:

Den e eleccion cu a pasa aña pasa, nos a tende hopi discusion di e termino “Carrying Capacity”. Di loke nos sa Aruba Tourism Authority, a traha un rapport amplio di e topico aki. Te cu mi sa, nunca a publica esaki si, y nos ta wak tambe cu e discusion di e topico aki no ta hayando mucho tension mas cercaa nos kader politico. Pasobra no ta solamente cu kier bin cu 16.000 trahador extra, pero tambe nos mester realisa, cu nan lo bin cu nan famia cercano. Ademas di esaki, mester hopi infrastructura den forma di scol, caminda, extra cama di hospital etc. Tur esaki mientras nos sistemanan actual ya caba ta bou presion inmenso. Den tur esaki e ta duidelijk pa mi cu Aruba a surpasa su Carrying Capacity, y den contexto aki nos kier puntra A.T.A. pa publica e rapport aki, pa pueblo lo por studia esaki di cerca.

Automatisacion:

Un factor tecnologico crucialmente importante ta e tendencia internacional di automatisacion. Ya caba nos ta wak varios reportahe internacional cu companianan grandi ta automatisando varios cupo di trabou, den por ehempel warehouse, cushina y te hasta trabou intelectual di caliber halto manera accounting y consulting. Awo imagina nos importa 16.000 trahador extra, pa despues resulta cu un parti grandi di tur e trabou cu salario minimo aki wordo automatisa. Esaki ta forma e argumento mas potente contra e importacion di trahador, door cu e tendencianan internacional tecnologico, ta indica cu gran parti di trabou por wordo automatisa caba. E tendencia aki den futuro lo solamente bira mas potente y como resultado mi ta di opinion cu un parti hopi di trabounan na hotel lo wordo automatisa por completo, bahando e necesidad pa labor humano. E lo ta un desaster di caliber inmenso, si resulta cu e miles di trahadornan importa den futuro cercano keda sin cupo di trabou door di AI & Automatisacion.

Deficit pa Svb & AZV:

Den un jaarverslag di un par di aña pasa, AZV a indica cu cada trahador cu salario minimo ta forma un deficit pa e fondo, esaki tambe ta e caso pa e fondo social di pensioen di Svb. Si mester bin cu 16.000 hende extra pa traha den trabounan salario minimo of hopi cerca di esaki, e fondonan social lo bin bou un presion inmenso riba largo plaso. Den e contexto aki tambe ta parce mi hopi imprudente pa haci esaki.

Scarsedad pa Vivienda:

Nos ta tende hopi rapport cu tin un scarsedad inmenso pa vivienda pagabel na Aruba, ya caba esaki ta hayando basta tension politico y tambe ta culpando e sector di vacation rentals pa e scarsedad di vivienda pagabel. Awo usando logica hopi simpel, si ya caba no tin vivienda pagabel na e momento aki, con nos por ga om cu e situacion aki si mester bin cu 16.000 trahador extra incluso nan famia cercano y tur e infrastructura cu mester wordo traha pa duna e trahadornan aki un existencia digno? Esaki simplemente lo haci e crisis di vivienda pagabel mas palpabel ainda. No tin ningun parlamentario ta nota e hecho simpel aki?