(NLTimes) – Elon Musk a atrae atencion internacional despues di comenta riba X tocante e caso di un hoben di 14 aña, Tamar, for di Marken. Musk a reacciona na un publicacion su usuario Hulandes riba X, ken a comparti e caso di Tamar y a compara esaki na un caso prominente na Reino Uni.

Den e caso Britanico aki, tabatin controversia tocante su autoridadnan a wanta detaye tocante un sospechoso su antecedente.

Musk a comparti e publicacion riba X, aregando e comentario: “Empatia suicida ta birando empatia homicida.” Despues di su reaccion, e publicacion rapidamente a bira uno viral, acumulando rond di 13 miyon bista den poco tempo.

Den e oranan trempan di 25 di juli 2020, net despues di 3or di mainta, Tamar a sali for di cas di su mayornan na Marken despues di un discusion tocante ki ora e mester bay drumi. Den oranan trempan di mainta a haya Tamar morto banda di Zeedijk entre Monnickendam y Marken.

E causa di su morto tabata un hit-and-run.

Investigadornan eventualmente a identifica e vehiculo, un Mazda shinishi y e personanan den esaki. E chauffeur di 27 aña a bisa polis cu e tabata distrai riba su telefon y a pensa cu el a dal sea un borchi of un bestia. El a mantene cu e no tabata altanto cu el a dal un persona.

Inicialmente, Ministerio Publico (OM) a determina cu no tin suficiente evidencia pa persigui un acusacion criminal di homicidio negligente. E sospechoso pa e motibo aki a evita persecucion pa e morto di Tamar, aunke el a ricibi un boet di 1.500 euro na 2021 pa maneha e vehiculo irresponsablemente y usa telefon mientras e tabata maneha. E decision aki a causa frustracion amplio y falta di comprension den famia di Tamar.

Expertonan comisiona pa Tamar su famia a haya indicacion cu e luga unda a descubri su curpa posiblemente no ta unda e accidente a tuma luga. Nan analisis a sugeri cu tin posibilidad creible cu a move su curpa despues di e accidente. Den su contesta, OM a asigna un ekipo nobo di investigacion pa evalua e teorianan aki, cual su resultadonan ta anticipa di revela den e procesonan di corte binidero.

Acusacionnan circulando online, incluyendo e publicacion amplifica pa Elon Musk, ta acusa cu pols inicialmente a bisa Tamar su mama cu e sospechoso tabata Aleman pa preveni un posible “Wilders Effect,” cual ta un referencian a sentimento anti-inmigracion asocia cu Geert Wilders.

E sospechoso despues a keda identifica como un nacional di Irak cu ta biba na Alemania. E acusacion a bira un punto di enfoke den debatenan mas amplio tocante politica di asilo, transparencia di autoridad y e manera cu ta trata e casonan di alto perfil criminal. OM desde e tempo aki a dicidi di persigui e homber di 33 aña. E huicio ta di cuminsa dia 30 di juni.

Representa pa e abogado Sebas Diekstra, Tamar su famia a reacciona na e atencion internacional inespera causa pa e biyonario su publicacion. E familiarnan ta bisa cu e caso awo ta resona na nivel global y cu Tamar su storia ta conmoviendo hopi persona.

E famia parcialmente a distancia su mes for di dialogo politico y comparacion cu casonan den exterior, enfatisando cu nan enfoke ta riba haya contesta y logra husticia.