(AP) — E cantante di R&B Cassie a para testigo diaranson bisando cu su ex-pareha Sean “Diddy” Combs a manten’e den un ciclo di abuso y explotacion door di menasa di saca videonan di dje ta participa den encuentronan, asina yama “freak-off”, cu trahadornan sexual masculino cu e la orkestra.

Dirigiendo su mes na corte pa un di dos dia den e huicio federal di trafico sexual di Combs na Manhattan, Cassie a bisa cu e no por a rechasa e demandanan di Combs y a sigui participa den e encuentronan a pesar di tabata disgusta y humilia door di tene relacion sexual cu hendenan straño. El a bisa cu e tabatin miedo cu Combs lo ruina su bida y hacie “parce un prostituta” door di publica e videonan.

“Mi tabatin miedo pa mi carera. Mi tabatin miedo pa mi famia. E ta djis bergonsoso. E ta horibel y repugnante. Niun hende no mester haci esey cu niun hende,” Cassie, ken su nomber legal ta Casandra Ventura, a bisa.

Ta anticipa cu e hurado lo wak algun di e videonan durante e huicio, posiblemente mas durante diaranson. Nan lo no ta visibel pa publico, y huesnan lo bisti audifono den sala di corte pa niun otro hende no por tende e audio.

Fiscal a acusa Combs di a explota su status como un ehecutivo di musica poderoso pa obliga Cassie y otro hende muhe cu violencia, tuma parti na e fiestanan sexual droga. Combs ta ser acusa di cinco cargo, incluyendo trafico sexual forsay fraude of coercion. E ta nenga tur e acusacionnan.

E abogadonan di Combs a reconoce cu e por ta violento, pero nan ta bisa cu e relacionnan sexual cu e tabatin, tabata cu consentimento y cu nada cu el a haci no a nifica traficacion sexual.

Diaranson, fiscal a mustra Cassie un serie di potret y el a identifica 13 como trahador sexual masculino cu el a bisa cu el a recluta cu peticion di Combs pa freak-off na Las Vegas, Miami y Los Angeles. El a bisa cu el a tene relacion sexual cu nan tur, aunke e no por a corda tur nan nomber. El a identifica un mey dozijn di otro escolta den corte diamars.

E testimonio di e dia a cuminsa cu Cassie describiendo un batimento feroz cu Combs a dun’e cu a keda captura riba video di vigilancia na un hotel di Los Angeles na 2016.

E video a mustra Combs ta dal, skop y purba lastra Cassie back pa nan camber. El a bisa cu el a sucede ora e tabata saliendo for di un freak-off. Despues cu e imagennan a ser filtra aña pasa, Combs a pidi despensa.

Cassie a bisa cu e asalto a lag’e cu un wowo preto, lip hincha y otro kemadura. Despues cu el a bandona e hotel, el a bisa cu su amiga a yama polis pero ora nan a yega el a nenga di revela ken a herid’e y polis a bay.

“Na e momento ey, mi no tabata kier haci’e dolor di e manera ey,” el a bisa. “Mi no tabata cla.”

Durante su prome dia di testimonio, el a pasa oranan ta conta detayenan fuerte y humiliante di su bida cu Combs, incluyendo e hopi freak-off cu a tuma lugar durante un decada te mas o menos 2017 of 2018. Tambe el a bisa cu Combs a batie numeroso biaha.

E freak-off a tuma lugar den priva, hopi biaha den cambernan di hotel scur, contrario na e fiestanan blanco hopi publico di Combs den Hamptons cu a atrae celebridadnan ‘A-list’.

Riba diaranson, Cassie a declara cu e tabata purba recupera di tur e freak-offnan door di ricibi likido via inyeccion, haya masashi y laga un chef cushina cuminda. El a bisa cu el a desaroya un adiccion na opioide door di usa nan despues di freak-off como un mecanismo pa enfrenta e situacion.

El a bisa cu despues di e encuentronan, el a sinti emocionalmente “djis realmente bashi y mi a sinti mi djis bruto.” El a bisa cu e tambe a sinti manera “mi a haci mi trabao.”

Cassie a conoce Combs na 2005, tempo e tabatin 19 aña y na cuminsamento di un carera como cantante, modelo y actor. E tabatin un cancion di exito, “Me & U,” na 2006 for di un album lansa pa Combs su Bad Boy Records. Combs, kende tabatin 37 aña ora nan a conoce otro, a alimenta su carera for di trempan y tambe a bira su pareha pa un decada.

Cassie a bandona e compania di Combs na 2019 y despues a demand’e na 2023, acus’e di añanan di abuso fisico y sexual. E demanda a termina den un acuerdo dentro di algun ora pero decena di demanda legal similar a sigui, loke a lanta e investigacion criminal contra di dje.

Combs, di 55 aña, ta encarcela for di september. E ta enfrenta por lo menos 15 aña di prison si condena su persona.

Ta anticipa cu e huicio lo dura mas o menos dos luna.