Investigacion grandi riba Parkietenbos y area ta pa sigura calidad di bida y di medio ambiente; “Gobierno ta obliga pa sigui recomendacionnan di Ombudsman”

Gobierno lo mester sigui recomendacionnan riba Parkietenbos y area pa mehora calidad di bida pa hende y medio ambiente y ta esey ta meta di un investigacion amplio di parti di Defensor di Pueblo, Ombudsman.

Ya ta pa un tempo cu oficina di Defensor di Pueblo, esta Ombudsman ta urgi comunidad afecta pa participa den un investigacion grandi tocante calidad di aire y molester di holor rond di Parkietenbos. E investigacion tocante polucion di aire, molester di holo y consecuencianan di esakinan ta importante pa pone riba mapa, ya cu nan tin efecto grandi riba calidad di bida, medio ambiente, salud, bida diario, trabou y actividadnan empresarial.

Riba e formulario digital OMBOX, ta splica cu pa medio di contestanan riba preguntanan, Defensor di Pueblo kier haya un miho bista di e naturalesa, magnitud y frecuencia di e molester cu ta experiencia den e area.

Bon Dia Aruba a tuma contacto cu oficina di Ombudsman riba e investigacion aki, cu a ilustra cu “investigacion ta trata molestia di holo persistente y problema di calidad di aire den e areanan rond di Parkietenbos, Mahuma, Buena Vista, Simeon Antonio, Bucutiweg, Wayaca y otro barionan den cercania. E investigacion lo mester indica si e molester por ta atribui na actividadnan den y rond di e ex dump na Parkietenbos, Ser’i Teishi, Barcadera y otro localidad.” Segun e Ombudsman, e investigacion no ta limita na e ‘landfill’ di Parkietenbos so, sino ta cubri henter e tereno di Parkietenbos, incluyendo e incinerator.

E investigacion a inicia door di un keho di un organisacion cu ta defende interes di e habitantenan den e barionan concerni. Ademas di e keho, Ombudsman tabata na altura di e kehonan den e area aki caba. Despues di e keho, Ombudsman a carga e investigacion y amplia esaki pa instancianan contra cual inicialmente no a entrega keho. Ta importante pa señala cu tin bes ciudadano no ta na altura contra cua instancia nan por entrega keho paso no ta claro cua instancia ta responsabel pa kico. P’esey e ley di Ombudsman ta duna Ombudsman e libertad pa haci investigacion riba propio iniciativa y ta keda na Ombudsman con e ta conduci su investigacionnan. “Tambe Ombudsman ta informa partidonan den e caso aki cu considerando e implicacion, alcance y duracion di e problematica, Ombudsman a dicidi pa investiga e asunto mas ampliamente,” a splica Bon Dia Aruba. “E obhetivo ta pa haya un indicacion mas completo di e causa y duracion di e molester di holo y di e problemanan di calidad di aire cu ta experiencia, pa determina si tabatin of no tabatin posibel efecto riba salud publico y riba medio ambiente. Tambe pa investiga e manera cu e instancianan envolvi a reacciona riba kehonan y peticionnan di habitantenan, y si e instancianan envolvi a coopera cu otro. Tambe pa por contesta e pregunta si e problema di holo y calidad di aire ta un problema structural cu mester cooperacion entre diferente instancianan pa resolve e problemanan.

Controla e controlado

Manera ta conoci, den pasado tambe tabatin keho di e buraco cu baliñanan na Seri Tijshi.y Ecotech. Como tal, Ser’i Teishi ta forma parti tambe di e investigacion, hunto cu Parkietenbos, Barcadera y e otro barionan. “Lo investiga e rol cu Ser’i Teishi por tin den e causa di e molester. E investigacion ta cubri tur e procesamento di sushi y e areanan den cercania.”

Ecotech no ta un instancia cu ta cay bou e ley di Ombudsman, pero si e instancianan cu ta controla e actividadnan na e compania. Den e sentido aki, Ombudsman por controla e instancianan publico aki si nan ta ehecutando nan trabou di control manera ley ta rekeri, a informa Bon Dia Aruba.

For di e momento cu a cuminsa manda carta pa instancianan y publica e investigacion riba medionan social, tur dia ta haya personanan cu ta yena e OMBOX of ta acerca Bureau Ombudsman cu informacion y documentonan cu por yuda den e investigacion. “Tambe por ripara cu mas hende a cuminsa papia tocante e investigacion den e medionan, y nan ta contento cu porfin un investigacion ta tuma luga tocante kehonan cu pa añanan ta conoci den nos comunidad,” a bisa Bon Dia Aruba.

Intencion di e investigacion ta pa scucha e habitantenan y pa haya sa kico e situacion berdadero ta y pa nan haya un bos den henter e situacion di un institucion imparcial. “E señalnan ta indica cu e problema no ta limita na caso individual, sino cu posiblemente un cantidad grandi di habitantenan afecta durante varios aña. Tambe kier scucha e instancianan envolvi pa wak si nan ta na altura di e kehonan y kico nan a haci pa yuda e habitantenan. Pues Ombudsman kier investiga e molestia di holo y e problemanan di calidad di aire, y con instancianan a trata cu e kehonan durante añanan.”

Despues di finalisa e investigacion, lo registra e resultado y conclusion den un rapport cu ta bay ta publico. Tur instancia concerni lo ricibi esaki y ta a base di locual sali afor, lo formula recomendacion, pa tur partido relevante.

Pa ley, Gobierno mester sigui cualkier recomendacion cu bin dilanti, segun cu a informa Bon Dia Aruba, particularmente mirando cu ta ehecutante e investigacion a base di e Landsverordening Ombudsman.

“Cumplimento cu recomendacionnan di Ombudsman ta obligatorio. Recomendacionnan di Ombudsman tin peso importante mirando e rol di Ombudsman como instancia imparcial. Loke Ombudsman ta publica y recomenda ta e bos di pueblo. Esaki ta crea responsabilidad pa tuma accion. Tambe Ombudsman ta hiba e rapportnan na atencion di Parlamento, cu ta e representantenan di pueblo cu por haci pregunta relevante encuanto situacionnan actual,” ta e declaracion di Ombudsman na Bon Dia Aruba.