Durante e ultimo dianan riba rednan social como tambe den medionan di comunicacion ta circula informacion di un caso entre WEB Aruba NV y Utilities Aruba NV. Cu lo por termina den posibel retiro di director di WEB. Parlamentario di fraccion AVP Clifford Heyliger a trece dilanti su preocupacion pa loke ta trata e situacion aki durante conferencia di prensa di fraccion AVP.

Parlamentario Heyliger a indica cu nan a tuma nota desde siman pasa cu Utilities Aruba NV tin intencion di kita director di WEB for di puesto, “pasobra e ta strobando nan di haci y deshaci”. Alabes el a tuma nota tambe cu cosnan a escala unda sindicato a sali y menasa di pone Aruba plat si nan kita e director di WEB.

 

El a splica cu esaki no ta nada nobo pasobra e director di WEB tin algun tempo caba ta luchando cu Utilities Aruba pasobra nan kier kit’e pasobra e no kier coopera cu e cambio di statutonan.

Segun Heyliger na 2022 Utilities Aruba a saca un EOI (expression of interest) pa e parke di molina d biento di Rincon, algo cu normalmente WEB ta haci, cual segun e parlamentario ta haci Utilities Aruba ta desviando di proceso y proceduranan normal.

El a sigui splica cu dia 22 di september 2022 e sindicato di staff di trahadonan di WEB Aruba NV, VWI, e tempo ey a pidi un audiencia cu Gobernador di Aruba, pero no haya esaki. El a indica cu VWI a pidi audiencia tambe cu e comision di energia den parlamento, pero tampoco a haya oido pa nan por expresa nan disgusto cu loke tabata tumando luga.

Segun e parlamentario e intencion di VWI tabata pa splica parlamento y Gobernador di Aruba cu locual Utilities Aruba tabata haciendo tabata contra di e statuto y ta un actividad ilegal.

Despues riba 14 di october 2022 VWI hunto cu sindicatonan y CUA a manda carta pa prome minister y presidente di parlamento e tempo ey pidiendo un reunion tocante EOI di Utilities Aruba, pero no a haya ningun contesta for di gobierno ni for di parlamento. Segun Heyliger e grupo a hasta pidi pa laga e comision di good corporate governance haci un sondeo riba esaki, pero tampoco a tende nada for di gobierno.

“Tanto cu e gobierno anterior a papia di integridad y transparencia, pero cada biaha cu toca nan pa demostra nan supuesto nivel halto di integridad nan ta bula pipa, nan no ta cumpli, nan no ta haci locual nan a bisa nan ta bay haci,” el a remarca.

E parlamentario a splica cu e ora no a keda VWi nada otro cu entrega un dossier na Ministerio Publico (OM) pa haci un investigacion. Segun el a sigui splica VWI a insisti riba su punto cu e EOI di Utilities Aruba ta un proceso cu no ta corecto cu e mester stop inmediatamente. Segun VWI Utilities no tabatin e meta ni permiso pa haci actividadnan di tene un destaho publico pa molina di biento na Rincon.

“E proceso ey ta impugna di e corporate governance entre Utilities Aruba y WEB Aruba NV. Segun VWI e proceso no tabata transparente y e actividadnan aki di Utilites ta trece hopi sospecho di posibel cosnan iregular,” el a indica.

Mirando cu VWI no tabata haya oido cerca gobierno ni tampoco parlamento pa trata e situacion cu tabata tumando luga, VWI a dicidi di traha su propio dossier y hiba esaki OM dia 22 di november 2022. Mientras tanto OM a informa VWI cu no por trata nan peticion pasobra VWI no ta un belanghebbend ya cu esun cu ta belanghebbend ta WEB y ta den WEB su man e ora pa haci un peticion asina.

“Di berdad bo ta kere cu director di WEB lo entrega keho contra su hefe na OM. Claro cu no. Lo a pasa cune net locual ta pasando awor. El a teme cu nan lo a kit’e y awor cu ta bin un discusion e mesun caso ta presenta su dilanti awor,” parlamentario Heyliger a remarca.

El a agrega cu algo cu si nan tuma nota di dje ta cu un tempo despues cu OM a informa VWI cu e no ta belanghebbend y cu no por inicia un investigacion di e EOI, e proceso di e EOI a ser para y te dia di awe e no a sigui.

Parlamentario Heyliger a remarca cu Utilities Aruba tabata sa masha bon cu nan tabata fout bezig y asina mes nan a dicidi pa cambia statuto di Utilities Aruba y WEB Aruba NV y awor esun tambe esun di e Raad van Commissarissen. Segun e parlamentario mirando cu nan tabata actuando malo segun statuto, nan no a pensa pa stop, pero mas bien a pensa pa cambia e statutonan pasobra e tabata stroba nan di haci locual nan kier a haci. “E unico conclusion cu bo ta saca eynan ta pa enrikece nan mes, enrikece esnan cu a pone nan eynan of esnan cu tin algun afiliacion cu nan. Esey ta locual e ta parse,” el a señala.

El a splica cu cambio di statutonan ta beneficia e amigonan di MEP cu e gobierno di MEP a apunta den diferente hunta di supervision. El a remarca cu ningun di e cambionan cu Utilities Aruba ta insisti riba dje ta na bienestar di WEB Aruba, cual ta e meta principal na momento cu un persona ser nombra como miembro di directiva y den un institucion, pa proteha e interes y bienestar di e compania of organisacion.

Pero den e caso aki, el a subraya, ta parse cu ora e persona ser nombra den un organisacion ta pa proteha su interes, pa enrikece su mes of esunnan cu tin aliansa of cu ta sponsor e persona.

El a splica cu e tarea di e miembronan aki ta supervisa e empresa, e maneho di e empresa, wak si e presupuesto ta bon y wak si tur cos ta ser haci. Pero awor nan kier haci cambionan cu unda na luga di e rol di supervision, e miembro ta bira un trahador cu e director mester cera un acuerdo cune.

“E cosnan aki ta preocupante. Esun mas obvio ta esun di Raad van Commissarissen di WEB, Elmar y Utilities unda ta exigi un golden handshake,” el a indica.

Parlamentario Heyliger a menciona como ehempel un situacion similar durate gobierno di Nel Oduber. El a splica cu e tempo ey e tabata forma di e sindicato y tabatin discusion cu e gobierno pa cambio di statuto na Elmar, cual na final a tuma luga.

“Awe nos ta wak cu Elmar cu ta ser maneha pa Utilities Aruba directamente. E director tanto bal e t’ey of no t’ey, e no tin autoridad… Awe Elmar keto bay ta vulnerable, keto bay tin falta di liderazgo, dicon? Pasobra politica ta dirigi e compania ey directamente via Utilities,” el a enfatisa.

En conexion cu e situacion preocupante aki parlamentario Heyliger ta bay manda pregunta cu na minister concerni. Algun di e preguntanan aki ta entre otro kico tin di berdad di e cambio di statuto; si e statuto di WEB a ser cambia caba pasobra segun el a indica aparentemente e director no a coopera y a bay rond di dje y a firma toch pa e cambio di statuto di WEB y awor nan ta forsando e director pa coopera pa e cambio di statutonan di e Raad van Commissarissen, cual segun Heyliger si e no firma nan lo kit’e.

“Nos kier wak gobierno tuma accion rapido, y lo puntra minister kico ta bay pasa cu Utilities, kico ta e intencion, ki dia e ta bay cambia e miembronan di e directiva, ki dia ta bay cuminsa cu un maneho cu berdaderamente ta sirbi e pais aki den e area di energia,” el a subraya.