Ayera den noticia local a circula informacion cu proximo siman, lo tin otro intento pa retira e Hunta di Comisario di Aeropuerto di Aruba. Esaki no ta e prome biaha cu e noticia di e intento di retiro di e Hunta di Comisario di aeropuerto ta circula, ya cu apenas siman pasa, tabatin un reunion cu e obhetivo aki, pero cu no a resulta manera a premira.

Esaki a keda publica den un relato di portal online, NoticiaCla.

Segun e noticiero, proximo siman diabierna ta bay tin un reunion, cu intencion pa duna retiro na e Hunta di Comisario, cu mientras tanto, a logra retene nan posicion.

Comienso di luna di mei, a bira conoci cu gobierno nobo, Gabinete AVP-Futuro, kier duna retiro na tur miembro di e Hunta di Comisario y nombra miembronan nobo. Esaki riba su mes no ta straño, pasobra ta algo cu normalmente por sucede na momento cu un gobierno nobo asumi nan cargo y ta busca pa rondona nan mes cu personanan di confiansa.

Sinembargo, e biaha aki a bati alarma pa e manera con e intento a bay, cu lo tabata contra bon gobernacion. E miembronan cu lo mester a haya e retiro tabata malcontento pa e manera cu a notifica nan di nan retiro.

E tempo aya, minister di Turismo, Wendrick Cicilia (AVP) a confirma pa NoticiaCla cu a manda na e miembronan y management team interino un invitacion pa un reunion general unda lo discuti e asunto, siman pasa na Bestuurskantoor. Aki e idea lo tabata pa duna retiro na e cuatro miembro actual di e Hunta di Comisario, y nombra cuatro miembro nobo.

Segun e relato, un di e miembronan nobo cu tabata kier a introduci ta e actual Chief of Staff di minister Cicilia, otro ta miembro di directiva di Aruba Tourism Authority (A.T.A), otro cu ya den pasado a yega di forma parti di hunta di AAA NV, y e di cuatro lo ta un Mericano, cu experiencia den aviacion, cu tambe ya a yega di forma parti di e hunta. Ta specula cu e Mericano lo ta e representante di Royal Schiphol Group, cu segun e MoU firma recientemente, lo a pidi pa un asiento den e Hunta di Comisario nobo.

E problema principal sinembargo ta keda e manera con a yama e reunion. A manda un e-mail na e miembronan actual di e Hunta di Comisario diabierna tardi, pa presenta den menos cu un siman na un reunion pa haya nan retiro.

Reaccion ex-minister Dangui Oduber

Mientras tanto, ex-minister di Gabinete Wever-Croes II, actual parlamentario di MEP, Dangui Oduber, a manda un serie di pregunta na minister Cicilia tocante e suceso aki. Su carta ta confirma e disputa cu tin andando den AAA NV, y a confirma tambe e rol di e acuerdo nobo cu Royal Schiphol Group.

“Prome, nos por a tuma nota cu Minister Cicilia ta firma un acuerdo cu Royal Schiphol Group pa nombra un CEO Hulandes y asina kita oportunidad di nos Rubiano, nos profesional, esun cu conoce nos isla, nos cultura, y sa kico ta come y bebe di turismo. Ora a pensa cu e lo por tin un poco remordimiento di e mal decision aki, ta yega na nos oido cu Sr. Cicilia kier cambia e statuto di AAA N.V. Sr. Cicilia kier introduci un cambio preocupante, esta e posibilidad pa nombra un miembro di Hunta di Comisario (1) pa un periodo indefini y (2) sin limite di edad. Esaki ta bay directamente contra Good Corporate Governance y ta habri porta pa politisa un entidad cu ta clave pa nos desaroyo economico,” Oduber a splica den un comunicado di prensa.

“Minister Cicilia no ta brinda e hunta ningun tipo di respet y ta hisa benta decision sin a reuni debidamente cu e hunta di directiva. Pues decisionnan crucial ta wordo tuma sin reunion of consulta cu e organo di supervision, algo cu tambe ta contra tur regla di transparencia y bon maneho,” el a continua.

“Ademas, ta parce cu Minister Cicilia, cu ta un hurista, no a tuma su tempo pa pasa door di e concepto di ley di Corporate Good Governance. E falta di consulta cu DWJZ, ausencia di motivacion den decisionnan, falta di transparencia cu Parlamento door di keda sin contesta pregunta y e insistencia pa entrega control na stranhero y na ‘un grupito’ sin consideracion pa nos profesionalnan local, ta refleha un direccion hopi preocupante pa nos pais y nos hendenan. Como pueblo, nos mester keda alerta. E structura di bon gobernacion ta existi pa proteha e interes general, pa preveni abuso di poder y pa stimula confiansa den nos institucionnan. Tur intento pa debilita esaki mester wordo cuestiona y rechasa,” e parlamentario a bisa, finalisando cu un yamado pa resolucion di e asunto: “Mi ta haci un yamada na e Gobierno AVP-Futuro pa brinda transparencia y contesta e preguntanan nos di Fraccion MEP a haci pa preserva integridad y honra codigo di bon gobernacion.”