Diabierna mainta a ricibi na Horacio Oduber Hospital miembronan di Hunta di Comisario di UOAZV, Sr. Detlef Hooyboer, Sr. Mike Wouters y tambe Sr. Frank Dennert. Presente durante e mainta aki pa representa HOH tabat’ey Hunta di Directiva di HOH Sr. Jacco Vroegop y Sr. Gregory Croeze y tambe Sr. Jossy Figaroa y Sr. Pieter Geersing di HOH su Hunta di Supervision. Un reunion unda den forma sumamente transparente a intercambia informacion extenso tocante e situacion actual cu HOH ta pasando aden cu tin consecuencianan grandi pa e calidad di cuido.

HOH a splica detayadamente di e combersacionnan cu ta andando cu directiva di UOAZV y tambe Minister di Salubridad desde luna di maart 2026, y awe 7 luna despues, lamentablemente ainda no a logra yega na un solucion definitivo. Alabes HOH a informa Hunta di Comisario di UOAZV cu si acaso nada no sosode den e siguiente dos siman, e listanan di espera lo bay subi mas ainda y tambe lo mira e efecto pashentnan cu tin un operacion of tratamento planea, manera un operacion di rudia, heup, lies y mas.

Hunta di Comisario di UOAZV ta na altura cu durante e lunanan cu a pasa, HOH a entrega tur documentacion necesario na directiva di UOAZV. Algun luna pasa UOAZV a pidi un compania externo pa haci un investigacion y e rapport aki a ser entrega na UOAZV, pero lamentablemente awo esaki tampoco no ta suficiente pa por yega na un solucion definitivo.

Pa asina e Hunta di Comisario haya un miho bista di HOH y su facilidadnan a hiba nan pa wak e estado di Clinica di Dialisis cu mester muda pa un localidad nobo y Minister di salubridad ni UOAZV no ta mira e urgencia den esaki.

Di biaha a sigui pa nan a conoce e localidad nobo di HOH su camber hiperbarico (HBOT) cu ainda no ta wordo cubri pa UOAZV.

Siguientemente a pasa departamento di Radiologia y tambe HOH su cushina cu den un futuro cercano lo mester wordo renoba of lo mester muda pa un otro localidad. A subi bay piso 5 di e edificio bieu cu ainda ta bashi y tur plan ta cla pa e wordo renoba pa un ‘state of the art’ Centro di dialisis pero no a logra yega na un acuerdo pa cu esaki ainda.

Despues a pasa Camber di operacion sigui pa Cuido intensivo.

Un recorido sumamente extenso, unda berdaderamente por a mira e interes halto y comprension di e miembronan di Hunta di Comisario di UOAZV pa cu e necesidadnan di HOH; y tambe e sin lubida e espacio cu a bira dos biaha mas grandi, y asina mes e lumpsum cu ta ricibi di UOAZV no a crece pa por cubri tur e espacio cu a bin extra.

A termina e recorido aki cu un combersacion unda nan a sigura HOH cu nan ta compronde e posicion di HOH completamente y alabes ta spera cu directiva di UOAZV y Minister di Salubridad pronto por tuma un decision cu ta beneficia nos pashentnan di Aruba y cu no lo tin consecuencia lamentabel pa e salubridad di nos comunidad.