Diahuebs15 mei, Aruba ta uni cu e resto di e mundo pa celebra e Dia Internacional di Famia. E Departamento di Asunto Social (DAS) ta probecha e oportunidad aki pa pone enfasis ariba e importancia di famianan den nos sociedad y e necesidad pa sostene nan durante henter aña — no solamente riba e dia aki.
Bou di e lema di “Sostene Famianan, Sostene Comunidad,” DAS ta recorda nos comunidad cu famia ta e base di desaroyo humano, formacion di balornan y sosten emocional. Den famia ta caminda mucha ta siña stima, respeta, ta responsabilidad y tin sentido di comunidad. Pero famianan por florece solamente si nan ta rondona di sosten y comprension di e comunidad.
Departamento di Asunto Social kier invita tur persona, negoshi y organisacion pa tuma un rol activo den sosten di famianan na Aruba. No solamente awe, pero cada dia. Un famia fuerte ta crea un comunidad fuerte!
Pa conmemora e dia aki, DAS ta informa cu e ta trahando cu e meta pa fortifica famianan, pa medio di:
Ofrece guia pa mayornan y famianan;
Apoya lantamento di mucha na un forma positivo ;
Promove campaña nan preventivo pa sostene famianan saludabel;
Traha na un programa di Certificacion pa promove Lugarnan di Trabou dirigi mas ariba famia “Family Friendly Workplaces”.
Departamento di Asunto Social ta sigui traha hunto cu scolnan, stakeholders y organisacionnan den bario pa garantisa cu cada famia na Aruba tin acceso na e hermentnan necesario pa por sostene su bienestar fisico, emocional y social.
Nos invitacion ta cla: Laga nos cuida nos famianan, fortalece e lasonan familiar y crece como comunidad. E bienestar di Aruba ta depende di e stabilidad di su famianan.
