(AP) — E prome negociacion directo di paz entre Rusia y Ucrania desde e prome simannan di e invasion di Moscu na 2022, a termina despues di menos di dos ora ayera, y mientras ambos banda a bay di acuerdo cu un intercambio grandi di prisonero, claramente nan ta keda leu di otro den condicionnan clave pa caba cu e bataya.
Un condicion asina pa Ucrania, sosteni pa su aliadonan occidental, ta un alto al fuego temporal como prome stap pa un resolucion pacifico. Kremlin a pusha contra un tregua asina, cu ta keda elusivo.
“Nos no a ricibi un ‘si’ Ruso riba e punto basico aki,” minister di Exterior Ucraniano, Heorhii Tykhii a bisa despues di e combersacionnan. “Si bo kier tin negociacionnan serio, bo mester tin arma den silencio.”
Pero cabesante di e delegacion Ruso, Vladimir Medinsky a pronuncia su mes como “satisfecho cu e resultado,” agregando cu Moscu ta dispuesto pa continua contacto.
Presidente Ucraniano, Volodymyr Zelenskyy a bisa cu el a discuti e combersacionnan cu presidente Mericano, Donald Trump y e lidernan di Francia, Alemania, Reino Uni y Polonia. Den un post riba X di un reunion di liderazgo Europeo na Albania, el a urgi “sancionnan pisa” contra Moscu si rechasa “un alto al fuego completo y incondicional y un fin na matansa.”
Na Istanbul, Kyiv y Moscu a bay di acuerdo pa intercambia mil prisonero di guera cada un, segun ambos hefe di delegacion, den loke lo bira nan intercambio mas grandi.
Ambos banda tambe a discuti un alto al fuego y un reunion entre nan hefenan di estado, segun hefe di delegacion Ucraniano, minister di Defensa, Rustem Umerov.
Medinsky, un assistent di presidente Vladimir Putin a bisa cu ambos banda a bay di acuerdo pa duna otro propuestanan detaya pa stop e bataya, cu Ucrania solicitando un reunion entre e hefenan di estado, cual Rusia a tuma den consideracion.
“E presion riba Federacion Ruso mester continua,” segun Serhii Kyslystia, prome vice-minister Ucraniano di Exterior y parti di e delegacion di Kyiv. “Nos no mester relaha na e punto aki.”
