Manera ta conoci, recientemente parlamentario di fraccion AVP, Clifford Heyliger como tambe medionan di comunicacion a trece dilanti informacion di un situacion cu lo tabata andando na WEB Aruba NV y cu lo por a termina den e posible retiro di director di e compania, loke a trece inkietud. Parlamentario y ex-prome minister Evelyn Wever-Croes (MEP) a reacciona riba esaki den un video cu el a comparti riba su pagina di Facebook unda e tabata duna comentario na prensa.

Den su reaccion, parlamentario Wever-Croes a sigura cu despues di a papia cu director di WEB, cu sindicato di WEB y cu diferente miembro di e directiva di e hunta di supervision, cu nan a sigura na su persona cu no tin ningun problema cu retiro di e director.

El a remarca cu e director di WEB Aruba ta uno capaz y alabes a enfatisa cu WEB ta un compania estatal cu ta cay bao di e reglanan di corporate governance bastante estricto y cu e ta sigur cu nan lo sigui atene nan mes na e reglanan aki, manera cu nan a haci durante su gobernacion.

Tocante kico ta corporate governance, el a splica cu e ta e conhunto di regla cu ta rigi con un gobierno mester atende cu un compania estatal of un fundacion y con e hunta di supervision mester supervisa e trabaonan.

E meta di corporate governance, el a sigui splica, ta pa sigura cu e compania, manera WEB Aruba cu a independisa WEB y bira NV, mirando e trabao importante cu e ta eherce pa henter comunidad, cu e trabao ta ser haci bon, na un forma profesional y cu ta garantisa continuidad pa e pueblo di Aruba.

Parlamentario Wever-Croes a indica cu corporate goverance tin otro meta mas tambe cu ta pa evita metemento politico den fundacion y companianan estatal.

El a splica cu metemento politico ta ora un minister kier mete y tuma decision pa e compania tocante ken por of no por traha den e compania, kico nan tin cu haci of no tin cu haci, of e por ta tambe ora otro figuranan politico, den e caso aki un parlamentario por ehempel, kier purba mete tambe. “Eseynan ta cosnan cu no ta aceptabel y p’esey mundialmente a bin cu corporate governance code,” el a indica

El a sigui splica cu tempo nan tabata den gobierno nan a traha riba e codigo aki pa hancra esaki den un ley, pero no a logra keda cla cune. El a menciona cu e ta spera cu e gobierno actual si keda cla cu esaki y mantene loke nan ta indica den nan acuerdo di gobernacion riba pagina 12 tocante cumplimento di corporate governance code.

“Mi ta pidi nan tambe pa no mete, no haci metemento politico ni den fundacionan deportivo, ni den WEB, ni den Elmar, ni den Utilities,” el a enfatisa.

Wever-Croes a splica cu aunke nan a bin cu e corporate governance code, no ta tur compania estatal ta cumpli completamente cune ainda, pero loke ta WEB, Elmar y Utilities, el a remarca cu nan si tin corporate governance caba, aunke e no ta den ley ainda.

El a sigui splica cu nan tin e codigo aki hopi estricto pasobra e ta forma parti di nan acuerdonan cu nan lenders, cu ta e banconan cu a presta nan placa pa nan inversionnan. A base di e corporate governance cu nan tin caba, cu ta indica por ehempel cu no por pone cual director cu ta, of kita un director, nan mester sigui e reglanan di e codigo y no por djis bisa cu ta kita tur e miembronan di directiva y pone otro miembronan pasobra tur tin cu pasa un screening.

El a remarca cu e banconan aki tin cu haci screening, e personanan mester cumpli cu un profiel y basa riba tur esey nan ta drenta den e directiva of como director. El a subraya cu pa kita hende ta conta e mesun reglanan y tin algun compania cu tin den nan statutonan poni cu no por kita full e directiva pareu pasobra mester precura pa continuidad.

“Metemento politico den compania estatal ta peligroso y p’esey corporate governance t’ey, pa evita e metemento politico. Mi ta compronde si un gobierno ta ser conseha pa conseheronan di antaño, conseheronan cu a traha tempo cu tur cos tabata por, conseheronan cu ta custuma cu cada gobierno cu bin ta cambia tur e directornan y tur e miembronan di directiva. Nan no ta realisa cu cos a cambia, mundialmente cos a cambia. Aruba tambe a cuminsa cumpli cu e reglanan aki di corporate governance, dus cu no por yega kita hende asina,” el a enfatisa.

Na mesun momento e parlamentario a haci apelacion na gobierno cu si berdad nan ta para tras di nan acuerdo di gobernacion pagina 12, caminda a skirbi cu nan no ta mete den companianan estatal, pa por fabor stop e metemento y persecucion di hende.

Parlamentario Wever-Croes a agrega cu e ta lamenta cu e ta mira cu ora gobierno realisa cu e no por logra loke e kier, cual segun e ta pa kita tur e miembronan di directiva y kita director, nan ta cuminsa insulta hende y esey, el a remarca, no ta aceptabel.

“Pa bo haya hendenan traha den directiva di companianan estatal e ta un cos grandi. Ta nos profesionalnan ta haci esaki, nos profesionalnan local ta haci esaki. Si nos lastra nan, insulta nan of permiti nan ser lastra y insulta, y e ora bo ta busca cu bo profesionalnan no ta bay asumi e cargonan aki mas si esey no ta den beneficio di pais Aruba, directornan tampoco,” el a indica.

Por ultimo el a splica cu e si minister encarga tin cualkier indicacion di cosnan cu a bay robes, e caminda cu mester cana ta Ministerio Publico y laga nan haci e investigacion.

Parlamentario Wever-Croes a reacciona tambe riba publicacion y comentarionan recien di parlamentario di fraccion AVP, Clifford Heyliger. El a expresa cu el a keda sorprendi pa e tono di su articulonan como tambe e tono cu e ta usa pasobra den parlamento e conoce como un persona “sensato y respetuoso”.

Na mesun momento el a agrega cu el a tuma nota cu parlamentarionan di AVP y di Futuro no tin tur informacion. El a splica cu ta comprendibel como cu nan ta nobo, y ta duna nan espacio pa nan siña y custuma cu nan trabao, pa nan sa kico ta nan rol, kico por y kico no por como parlamentario.

“Bo no ta lider sindical mas, awor bo ta parlamentario y como parlamentario bo tin full un otro rol, full un otro responsabilidad y no por haci tur loke bo tabata haci e tempo ey como sindicalista,” el a indica referiendo na parlamentario Heyliger, ken tabata sindicalista den pasado.

Por ultimo, el a remarca cu ta haya lamentable cu e partido Futuro y AVP no ta inverti den nan hendenan y “ta laga nan parlamentarionan haci blunders di e forma aki simplemente pasobra nan no sa talbes kico ta nan trabao, kico ta nan rol, kico ta nan responsabilidad, mi ta dispuesto semper pa yuda cu informacion pero mi ta kere cu ta importante pa nan tur siña un poco mas kico ta corporate governance pa realisa cu ni como parlamentario, ni como minister bo no por mete den companianan estatal asina ki.”