(AP) – Ora cu un barco naval halto a accidenta contra Brooklyn Bridge, e tabata maniobrando den awanan turbulento. E marea a caba di cambia y tabatin coriente lihe.
Mientras cu e tipo di peligronan aki ta facil pa un capitan experiencia maneha, erornan por ta costoso den e waf di New York, unda canalnan fini y cu hopi curva ta combina cu bientonan fuerte y crea un pasahe dificil.
Den e caso cu Cuauhtemoc, dos miembro di e barco a fayece y 19 a keda herida ora cu e barco a accidenta contra e brug icnonic, causando daño material na e barco mientras e tabata acerca un pier. Te ainda ta desconoci kico a causa e accidente, y un investigacion di National Transportation Safety Board ta hopi probable di dura lunanan pa completa.
Sinembargo imagennan di e accidente graba pa e personanan cu tabata na e pier, ta mustra con e barco tabata yega e brug cu velocidad, sugiriendo cu e capitan a perde control di e motor. Tambe a surgi pregunta tocante si e boto di escolta a retira demasiado trempan y si mester a mara esaki na e barco of si esaki mester a keda te ora cu e barco a yega lama. Preocupacionnan similar a surgi ora cu un barco di carga a accidenta contra un brug na Baltimore aña pasa.
Sal Mercogliano, un ex marinero cu a maneha varios barco door di e waf di New York, a bisa cu tur e “pio scenarionan” aki – e barco su haltura, un coriente fuerte, biento pisa y e ausencia di un escolta – tur a contribui na e tragedia.
“E cos mas prudente cu por haci lo ta di a bay dos ora prome, ora cu e marea tabata cambiando. Esey lo a tabata e momento ideal,” Mercogliano a comenta. “Pero mi no ta kere cu nan a anticipa cu nan motor lo a impulsa nan na e brug.”
Sinembargo, el bisa cu a evita un catastrofe mas grandi ainda danki na e manera cu a traha e barco, cual a preveni cu e partinan cu a kibra a cay den awa, ademas di e hecho cu e ekipo a keda den nan posicion na luga di tuma e riesgo cu e miembronan lo cay for di 12 pia halto.
“Bo por a tin hendenan pega ta hoga den e riu,” el a bisa. “Esaki pro a ta hopi mas pio.”
Cuautehmoc a bishita New York como parti di un tour di buena fe di 15 nacion y tabata bayendo caminda pa Islandia ora cu el a accidenta contra e brug alrededor di 8or di anochi, brevemente parando trafico.
Alcalde Eric Adams a bisa cu e brug di 142 aña a scapa di daño grandi, sinembargo por lo menos 19 di e 277 miembro abordo di e barco tabatin mester di tratamento medico. 2 di e 4 persona cu a sufri heridanan serio a fayece mas adelante.
President di Mexico Clauda Sheinbaum a lamenta e perdida, publicando cu “nos solidaridad y sosten ta bay na nan famia,” riba e plataforma X, anteriormente conoci como Twitter.
Cuauhtemoc a nabega pa prome biaha den 1982. E ta casi 300 pia largo y tin un haltura di 160 pia, cual ta alrededor di 30 pia mas halto cu Brooklyn Bridge.
E barco, cual a yega New York dia 13 di mei, a cuminsa e salida for di e waf druk South Street Seaport, unda e tabata para pa varios dia, dunando bon bini na bishitantenan. Ta desconoci ainda si e capitan Mexicano a pidi un piloto asistencia cu esaki, sinembargo un piloto di waf tabata abordo pa esaki por sali for di e waf, manera ta rekeri.
