(AP) — Rapero Kid Cudi a declara diahuebs cu Sean “Diddy” Combs a drenta su cas den Hollywood Hills na 2011 despues cu el a haya sa cu Cudi tabata saliendo cu su ex-pareha, cantante di R&B Cassie, y Cudi ta bisa cu e ta sigur cu Combs tabata tras di e kimamento di su auto algun siman despues.
Durante su testimonio den e huicio federal pa traficacion di hende cu ta tumando lugar na Manhattan, Cudi a bisa cu mientras e y Cassie tabata saliendo pa un periodo cortico, el a hiba Cassie na un hotel den West Hollywood pa aleh’e for di Combs cu tabata hopi rabia. Mientras cu nan tabata eynan, el a haya un yamada di Capricorn Clark, assistent di Combs. E señora a bisa cu Combs y un afiliado tabata den cas di Cudi y cu e tabata obliga pa bay cu nan.
Cudi, ken su nomber legal ta Scott Mescudi, a bisa cu mientras cu tabata coriendo bay cas, el a yama Combs pa puntr’e pakico e tabata den su cas. Combs a contest’e calmamente: “Mi kier papia cu bo.”
Pero ora Cudi a yega cas, Combs no tabat’ey, segun su testimonio. Loke el a haya tabata un regalo di Pasco habri cu el a cumpra pa su famia, y su cacho den baño cera. Cudi no tabata sigur kico tabata pasando y a yama polis.
Auto di Cudi cendi na candela
Algun siman despues, segun su testimonio, su Porsche 911 convertible a haya daño di candela mientras cu e tabata para dilanti su cas. Cudi a bisa cu e tabata na cas di un amigo ora un persona cu ta cuida pa su cacho a yama pa bis’e cu su auto tabata na candela. Huradonan a mira potret di e interior di cuero cora cu tabata kima, cu un buraco den e tela di dak. Un cocktail Molotov a ser haya riba e asiento di pasahero, Cudi a bisa.
Cassie, ken su nomber legal ta Casandra Ventura, a declara siman pasa cu Combs a menasa pa explota auto di Cudi y caus’e daño despues cu el a haya sa cu Cassie tabata saliendo cu Cudi.
Cudi a bisa cu e no tabata den conflicto cu ningun hende mas cu no tabata Combs. “Mi djis tabata sa cu e tabata envolvi den dje,” Cudi a bisa, loke a causa obhecion for di abogado di Combs. A pidi e hurado pa ignora e comentario.
Combs ta nenga envolvimento den e kimamento
Cudi a bisa cu el a topa cu Combs e dia siguiente den un hotel na Los Angeles pa purba soluciona e situacion. “Despues di e candela, mi a bisa, esaki ta saliendo for di man. Mi mester papia cune,” Cudi a bisa.
Na fin di e reunion, mientras cu nan tabata para y duna man, Cudi a bisa cu el a bisa Combs: “Kico nos ta haci tocante mi auto?” Combs a mir’e cu un “mirada friu” y a contest’e: “Mi no sa di kico bo ta papiando.”
Cudi a bisa cu el a pensa cu Combs tabata gaña, pero el a laga e cos bay, y nunca mas algo a pasa den su cas. Algun aña despues, Combs a pidi pordon “pa tur cos” ora nan a topa den un hotel, segun testimonio di Cudi.
Durante testimonio di Cudi, Combs tabata keto. Aunke e tabata mira e banki di testimonio, ningun di dos a reacciona na otro. Cudi no a mira Combs ora el a lanta for di e banki. Bisti cu jeans y un jacket di cuero preto, Cudi a yega na corte ta humando un sigaria cu un persona cu tabata tene un paraplu riba dje. E no a papia cu reporteronan ora e tabata saliendo di e edificio.
Combs, 55 aña, a declara no culpable riba cargo di traficacion di hende y crimen organisa. E ta nenga cu el a usa menasanan of su poder den industria di musica pa abusa hende muhe y otronan, y ta nenga cu el a forsa Cassie of otro hende pa tuma parti den actonan sexual cu droga yama ‘freak-offs.’
Abogado di Combs ta bisa cu Cassie tabata biba ‘dos bida’
Durante e examinacion di defensa, abogado Brian Steel a pinta Cassie como e malvado den su relacionnan cu Combs y Cudi, sugeriendo cu e tabata sali cu tur dos y tabata biba “dos bida.”
Cudi a bisa cu ora el a cuminsa sali cu Cassie fin di 2011, Cassie a lag’e kere cu e y Combs a termina. Pero Cassie a testifica anteriormente cu den realidad, el a sigui tene relacion cu Combs y tabata usa un otro telefon pa tuma contacto cu Cudi pa nan relacion keda secreto.
“Señora Ventura tabata biba dos bida diferente, ta berdad?” Steel a pidi.
“Si,” Cudi a contesta.
Cudi a bisa cu e tabata stima Cassie y tabata sinti dolor ora el a descubri cu el a bolbe na Combs.
