Con bon cu un sistema legal por ta formula, cumplimento den practica ta comproba cu ta surgi incumplimento inespera, cu den cierto caso por termina den procedimento hudicial, hasta penal.Esaki ta parce di ta e caso sin finalna vista di e nombramento di un ministro pacartera di infrastructura, planificacion y energia. E caso cu e candidato a entama den corte a yama atencion pa e contratacion di un abogado externo pa Servicio di Impuesto, loke a causa bastante comentario, mientras esey no ta e aspecto principal. Manera exponi caba den un anterior Editorial, e pregunta ta:kico e candidato pa ministro ta pensa di gana cu un caso contra Servicio di Impuesto, si e departamento, den persona di Inspector, a entrega e rapport caba na e Formador y na Gobernador, manera ley ta exigi? Ta ey lo mester bin accion. Nos ta referi aki tambe na e comentario,parcialmente incompleto, di un parlamentario cu ta declara cu e rapport di Servicio di Impuesto a bay pa Formador, mientras tanto tambe Promer Ministro, y ta opina cu e lomester actua. Esey ta berdad den e sentidodi articulo 8, inciso 2, di e ley di screening cu ta bisa: “Den caso cu no ta propone un candidato pa nombramento como ministro, e formador ta informa su persona mas pronto posible por escrito di esaki, cu mencion di e motibo di esey.”
Loke e comentario parlamentario no ta informa ta cu e ley (articulo 2, inciso 2) ta bisa: “E peticion pa implementacion di e investigacionnan na cual ta referi den e promer inciso ta ser haci pa e Formador. E resultado di e investigacionnan ta ser comparti cu e Formador y Gobernador.”Kico esaki ta significa, teniendo na vista henter e proceso di evaluacion, cu ta encera varios rapport confidencial di varios instancia? Cu e uniconan cu ta haya e rapport di Servicio di Impuesto ta e personanan menciona den e ley: Formador y Gobernador. Y kico nos ta mira den corte awor? Ta pidi huez un veredicto riba un rapport confidencial cu no ta supposed di ta den man di e candidato mes, ni di ningun otro persona cu no ta e dosnan menciona den ley. Esaki por haci cu e caso den corte por tuma un rumbo inespera. Por ehemplo, huez por puntra con e por comproba cu esaki ta e documento autentico cu Inspector a entrega, solamente pa wowo di Formador y Gobernador. Aki, si abogado di e candidato por proba cu e documento presenta ta copia fiel di e original, ta pasobra un persona den e aparato a firma pa autentica esey. Ken den su sano huicio ta haci esey? Un siguiente pegunta di e huez por ta, kico e candidato y su abogado ta haci cu un documento secreto cu no mester ta publico, y ademas ta desea un veredicto di huez riba un conseho (confidencial) cu e normalmente lo no tabatin su dilanti. Por bien ta cu e huez ta declara e caso no admisible (niet ontvankelijk), ya cu e lo mester duna un opinion tocante un conseho cu no tabata pa otro persona haya pa mira, pues pakico su opinion? E rumbo cu e caso por tuma den corte ta cu e candidato tin un causa, segun su pensamento, pero ta termina den no tin un caso, den corte… Ademas por resulta, den e proceso di evaluacion di su candidatura mes, cu no necesariamente un evaluacion negativo ta bin for di e rapport di Servicio di Impuesto so, sino por ta consecuencia di loke lo sucede despues, ora por a constata cu e candidato lo tin e informe cu e no mester tin den su poder, te bay corte cune.Esaki por ta un motibo fundamental pa considera cu e no ta apto pa e funcion.Si no por confia bo cu secreto gubernamental promer cu drenta den e funcion, lo no tin hopi speranza cu despues cos lo drecha.Formador anto por haya notificacion cu por propone e candidato, pero cu no por garantiza cu posible obhecion den e proceso di evaluacion, no di e screening mes, no ta resulta finalmente den no nombra e candidato. Na e momento ey e Formador no por haci nada otro cu cumpli cu ley, manera indica ariba, y informa e candidato cu e no lo haci tal proposicion pa nombramento, cu mencion di e motibo.Si acaso haci e propuesta toch, pa mantene e apariencia di paz den e partido, ainda por sucede cu no ta honra e proposicion y no tin nombramento.
No ta nada straño cu den medio di comunicacion ta sigui presenta e asunto aki como un pleito na Aruba so, desconociendo e hecho cu tin un diferencia entre e proceso previo di screening, cu ta resulta den un serie di rapport confidencial, a base di cual y añadiendo otro consideracion, igualmente confidencial, ta tuma un decision.Por considera hiba e rapport di Servicio di Impuesto na luz publico un eror garafal y hasta por ta motibo pa un investigacion hudicial ta con e candidato a yega na e rapport.
Ta di comprende cu, si esaki ta e trasfondo berdadero di e asunto, e partido mayoritario di e gabinete aki no por haci nada otro cu actua segun e resultado aki, pasobra ningun pleito entre partido, o dentro di partido, lo por cambia un decision final, cu no ta depende discreening so.Esaki ta pone e gabinete den un situacion penoso, unda mantene e procedimento legal corecto no semper por conta cu actuacion corecto di tur esnan envolvi.
