Recientemente miembro di fraccion MEP parlamentario Dangui Oduber, ken ta ex minister di Turismo, a manda un carta cu un lista di pregunta pa e actual minister di Turismo, Wendrick Cicilia, tocante e MoU cu a ser firma entre Gobierno di Aruba y Royal Schiphol Group (RSG).
Den su carta parlamentario Oduber ta indica cu Parlamento di Aruba, incluyendo lider di fraccion AVP parlamentario Jennifer Arends-Reyes ta haya cu no tin suficiente claridad tocante e MoU cu a ser firma.
Oduber ta menciona cu den un declaracion cu minister Cicilia a haci na un medio di comunicacion e ta informa cu e no tin ningun problema pa bay parlamento pa duna informacion y claridad tocante e situacion.
Pero e parlamentario ta indica cu te ainda, seis siman despues, ainda gobierno no a comparti e contenido di e MoU entre Aruba y RSG cu Parlamento di Aruba, e mandatario encarga cu e cartera di turismo tampoco a presenta den ningun reunion, ni a contesta ningun pregunta cu el a ricibi tocante esaki.
“Minister e asunto aki ta uno hopi importante pa pais Aruba. Como gobierno anterior tabatin hopi punto den e negociacion cu no tabata faborece pais den ningun forma y cu absolutamente no lo por bay di acuerdo cune,” parlamentario Oduber a remarca.
E lista di pregunta cu e parlamentario a manda pa minister Cicilia ta consisti di 16 pregunta den total. Oduber a puntra e minister si e por comparti cu parlamento e MoU cu a ser firma entre gobierno y RSG; si e por informa parlamento si a bay di acuerdo cu tur condicion cu RSG a presenta; si e por informa parlamento cual ta e condicionnan cu Aruba Airport Authority (AAA) NV/Gobierno di Aruba tin pa por continua cu e relacion cu RSG; y si RSG ta dispuesto pa cumpli cu e condicionnan cu AAA NV/Gobierno di Aruba tin.
Parlamentario Oduber a puntra e mandatario tambe si e por informa parlamento si a duna RSG atrobe e CEO, no uno local, locual e parlamentario a indica lo ta un falta di respet y ta menosprecia e localnan.
Oduber a puntra minister Cicilia si e por elabora tocante kico ta e motibo cu e ta kere cu un persona local no ta apto ni capaz pa maneha e aeropuerto; si e no tin confiansa den e profesionalnan local; y si acaso e ta kere cu un local no por cumpli cu e exigencianan pa ta CEO di e aeropuerto.
E parlamentario di fraccion MEP a puntra e mandatario si e por comparti cu Parlamento di Aruba tambe kico ta e exigencianan cu un persona mester cumpli cune pa por fungi como CEO di aeropuerto; si e ta kere cu un local por maneha e aeropuerto; y si e ta dispuesto pa para fuerte pa un local por haya oportunidad pa ta CEO di e aeropuerto.
Oduber tambe a cuestiona minister Cicilia si e no ta kere cu despues di 20 aña di tin un acuerdo cu RSG a yega un momento pa un local maneha e aeropuerto; y si e nombramento di un CEO local lo ta un punto di kiebre den e negociacionnan cu RSG.
Por ultimo parlamentario Oduber a puntra si minister Cicilia por informa parlamento si pa prome biaha den historia a entrega un stoel den e Hunta di Supervision na RSG; si lo haci excepcion di e LNT pa e CEO di aeropuerto y si den caso cu e contesta ta si, si e mandatario lo haci mescos pa e CEO di APA y ATA.
Den luna di april, na momento cu Gobierno di Aruba a firma e MoU cu RSG, prome minister Mike Eman a splica cu tabatin algun desafio cu entre otro, a conduci na un impasse. Un di esakinan tabata e legislacion di LNT, cu a haci’e dificil pa Schiphol nombra un CEO general.
Prome minister Eman a sigura e momento ey cu nan a compromete, despues di bon cooperacion cu minister di Finanzas, cu nan lo busca un salida den e disposicion di LNT pa asina AAA localmente of internacionalmente por atrae un CEO nobo y na mesun momento tambe habri posibilidad papa compensa e oficialnan principal di miho forma pa Aeropuerto Internacional Reina Beatrix por ta un aeropuerto competitivo.
E mandatario tambe a indica e momento ey cu Gobierno di Aruba y Royal Schiphol Group a yega na palabracion cu Schiphol por postula dos nomber y despues pais Aruba, como e unico accionista, ta scoge un miembro for di e dos nombernan nomina pa forma parti di Hunta di Supervision. Den caso cu no ta satisfecho cu e dos nomber, gobierno lo pidi pa nomina otro dos nomber.
“Nos ta hopi contento cu nos a logra haya otro awe. Nos ta mira e colaboracion cu Schiphol como un oportunidad special pa sigui desaroya e sostenibilidad di nos aeropuerto y nos ta mira tambe oportunidadnan di crecemento, tanto pa loke ta trata e parti operacional di e aeropuerto, pero tambe pa loke ta trata fortificacion di personal,” prome minister Eman a declara e momento ey.
Pa loke ta trata e posibilidad pa un local asumi e puesto di CEO di AAA NV, minister Cicilia a indica durante e conferencia di prensa na momento cu a firma e MoU cu RSG cu e intencion y deseo ta pa busca un persona local, pero el a agrega cu den e caso aki locual ta importante pa gobierno ta cooperacion y e parti di maneho di e aeropuerto, y mirando e complehidad di maneha un instituto y organisacion di e magnitud aki, e ta rekeri cierto experticio, criterio y obhetivo cu e persona cu lo asumi e funcion aki mester cumpli cune.
El a splica tambe cu ora nan a comunica na Royal Schiphol Group cu nan deseo ta pa busca un persona local pa e trabou, e no tabata un punto cu lo hiba na descontinuacion di e cooperacion strategico. “Nos deseo claro ta un local, pero esaki no tabata punto di kiebro pa nos den locual tabata e discusion y dialogo cu tabatin. Importante ta cu tin personanan cualifica cu a base di criterionan y obhetivo por cumpli cu cierto profielnan y mantene e standard halto cu nos tin na e momentonan aki,” minister Cicilia a enfatisa e momento ey.
Di su banda Kjell Kloosterzie, director di Schiphol International a indica tocante e contratacion di un persona local of di afo pa dirigi maneho di e aeropuerto, cu esey nunca no tabata un condicion. El a splica cu nan ta responsabel bou di e contrato actual y e contrato den futuro pa nombra un hefe ehecutivo capaz y di calidad halto.
“Nos ta scoge e miho persona cu nos por haya pa e proposito ey, a base di criterionan obhetivo cu nos ta determina hunto cu e Raad van Commissarissen,” el a enfatisa e momento ey.
