Recientemente, parlamentario di fraccion AVP y candidato pa minister, Mike de Meza, despues di regresa di Hulanda, a duna un declaracion na medionan di comunicacion tocante e ultimo desaroyonan alrededor di su proceso di screening y nominacion pa minister. Informacion recien ta revela cu director di DIMP a entrega un keho formal na Ministerio Publico (OM) contra e parlamentario, locual awor ta para henter e proceso.
De Meza a indica cu ya nan ta bezig cu e situacion aki pa algun luna caba y awor ta entama un caso, despues di e tanto luna di discusion, pa motibo di, segun e parlamentario, diferencia di opinion entre De Meza y DIMP relaciona cu su screening pa minister.
De Meza a splica cu dia 28 di mei a tuma luga e tratamento di e caso cu el a entama contra DIMP, y dia 30 e mester a biaha pa Hulanda pa motibonan personal. Dia 4 di juni, hues a dicta su sentencia y segun el a indica un dia despues, dia 5 di juni, el a ser informa cu OM a tuma contacto cu gobierno y a bisa cu mester para e proceso atrobe pasobra nan ricibi un keho y nan tin cu bay haci un investigacion penal.
“Ta ridiculo. Esaki ta mustra bo cu ta busca tur sorto di rason pa extende un biaha mas of pa bay warda riba awor un otro investigacion. Director di DIMP aparentemente a entrega un keho dia 23 di mei, cinco dia prome cu e caso den corte, locual ta straña mi hopi pasobra durante caso den corte a haci pregunta na e director si tin algo otro, si tin debenan, pero a bisa cu no tin debe; si tin aangifte cu no a ser entrega, pero tur cos a ser entrega, si tin algo otro, pero el a bisa no tin nada otro,” De Meza a bisa.
El a splica cu casi un siman prome caba DIMP a entrega e keho, pero cu aparentemente e keho lo tabata wanta sperando e resultado di corte pa mira si e veredicto no tabata beneficia nan, pa e ora cuminsa cu un otro caso.
“E cos aki nan ta yam’e persecucion politico. E ta ridiculo… pero en fin nos ta totalmente transparente, nos no tin ningun problema, nos t’ey. Nos a tende un keho lo a ser entrega y aworaki ta parce cu mi ta sospechoso. Nos mes no a haya nada oficial ainda, pero aparentemente nan a duna e informacion na prome minister si,” el a agrega.
De Meza tambe a cuestiona e involucramento di OM, un di e entidadnan cu inicialmente a dun’e un declaracion positivo den su proceso di screening, pero awo diripiente tambe ta envolvi.
El a remarca cu e unico problema cu tabatin cu DIMP tabata e diferencia di opinion. Loke ta trata tur e otro instancianan, incluyendo OM, a duna na declaracion positivo. Pero awor, despues cu a entrega e keho, segun De Meza, OM ta trek terug nan decision cu nan a tuma pasobra aworaki nan tin cu haci un investigacion.
“E cosnan aki ta gewoon persecucion politico. E ta hopi vies. Bo tin un pais caminda cu gobernantenan tin cu goberna pais Aruba, caminda tin cu forma gobierno. Aworaki no ta prome minister/formador ta forma gobierno mas, no ta parlamento ta dicidi, ta algun ambtenaar ta dicidi kico ta pasa riba e pais aki. Esey ta un berguensa, un decadencia den nos derecho democratico cu tin na Aruba,” el a subraya.
De Meza a sigura cu e ta bay haci su parti cu su abogadonan, pero alabes el a remarca cu e ta bay wak unda parlamento y unda gobierno ta para den esaki. “Si bo ta bay acepta esaki ami sigur no kier ta parti di e gobierno aki. Pasobra si bo ta bay acepta cu pueblo a vota pa bo, pa abo bay goberna, pero bo no ta goberna, bo no ta tuma decision, ta ambtenaarnan ta dicidi ken ta bira minister, ki trabao mester ser ehecuta… Ambtenaarnan ta dicidi cu nan ta blokia un nominacion,” el a agrega.
E parlamentario candidato pa minister a splica cu den e ley di screening articulo 8 ta indica cu pa un formador of prome minister propone un candidato pa minister, tin diferente parti cu e ta dicidi y ta evalua y di e lista aki tin dos aspecto cu ta pisa mas. Uno di nan ta si e candidato a ser condena durante ultimo ocho aña pa un caso penal y e otro ta si e candidato ta un sospechoso den un investigacion.
Dia 4 di juni, despues cu veredicto di hues a bira conoci, prome minister/formador Mike Eman a bisa den su declaracion cu awor cu el a haya informacion di corte, e ta bay tuma su decision. Pero aworaki DIMP a entrega e keho, locual automaticamente ta para e proceso pa haci investigacion y trata e caso, cu lo por dura un tempo largo.
“Ami ta bringa mi caso, formador, gobierno, parlamento mester dicidi kico nan ta haci, y ora nan dicidi ami ta tuma mi decision tambe,” De Meza a enfatisa.
Di su banda, abogado di De Meza, Desiree Croes, a splica cu despues cu nan a ser informa di e noticia cu director di DIMP a entrega un keho na OM contra su cliente, di biaha nan a manda un e-mail pa OM pa meld nan mes como abogado di De Meza y nan a pidi di biaha informacion tocante kico ta e acusacionnan cu tin contra su cliente. El a indica cu nan a ricibi contesta for di OM un dia despues, cu a informa nan cu nan ta laga nan sa ki dia nan por sinta hunto pa asina por duna nan e informacion cu nan a pidi.
“Henter Aruba sa e importancia di e situacion cu nos ta aden y e proceso cu nos ta aden. Nos ta lamenta e hecho cu e persona cu a haci e aangifte, e dia den corte ningun momento a bisa cu tin un aangifte haci,” el a enfatisa.
Bon Dia Aruba a tuma contacto cu vocero di Ministerio Publico como tambe pers chef di Gabinete AVP-FUTURO pa puntra si por confirma e informacion y si por splica tocante kico e keho cu DIMP a entrega ta trata, pero for di ambos a ricibi contesta cu na e momentonan aki no ta duna ningun comentario.
Alabes Bon Dia Aruba a purba tuma contacto cu Sr. De Meza y a puntra e parlamentario si nan tin informacion tocante kico ta trata e keho cu DIMP a entrega na OM, si nan a informa su persona kico ta e acusacionnan cu nan tin contra di dje, con esaki ta afecta su candidatura como minister y si su relacion cu AVP ta afecta. Pero te na momento di ciere di nos edicion no a ricibi respuesta na e preguntanan manda.
